Chelsea defender thar Fofana

Chelsea chuan pound maktaduai 70-in Wesley Fofana chu Leicester City aṭangin an lalut a, kum sarih atan contract an ziak. French centre back hi a chet ṭhat dan a zirin a man hi a la pung leh thei ang.

France Under 21 international Fofana hian kum 2020 khan Saint-Etienne aṭangin Foxes hi a zawm a, Premier League-ah match 37 a khel tawh a ni.

Season liam ta khan pre-season friendly-a Villarreal nen an inkhelh ṭumin a ke ruh a ti tliak a, hemi vang hian league match sarih chauh a khel.

Kum 21 mi Fofana chuan, "Tukin (nimin) khan team zingah training ka nei a, mumang ram a thleng dik. Club ṭantute hmaa khelh ka châk tawh hle. Chelsea ka pan chhan hi nomawi chawi ka duh vang a ni a; Champions League, Premier League, FA Cup leh Carabao Cup ah te champion ka duh," tiin a sawi.

FA Cup 2021 final-a Leicester City-in Chelsea an hneh ṭum khan Fofana hian Foxes tan inkhel bul a ṭan. Tun nipui bazarah Blues hian Fofana hma hian Raheem Sterling (£50m), Kalidou Koulibaly (£34m), Carney Chukwuemeka (£20m), Marc Cucurella (£60m) leh Cesare Casadei (£13m) te an lalut tawh a ni.