Zaninah transfer a tawp dawn, beisei tur ṭha a la awm?

Europe league lian ho tan football nipui bazar chu zanin hian a tawp dawn a, football ngainatute tan chuan men rei zan pawh a tih theih ang. Transfer bazara thil thleng ngaihven pahin Manchester United leh Leicester City te an inkhel thlir tur a awm dawn a, transfer ngaihnawm a awm ngei a la rinawm bawk.

Ronaldo a cham dawn
Cristiano Ronaldo hi khawvel footballer ṭha bera ngaitu tam mah se tun dinhmunah erawh a ni tawh lo. Portugal captain hi United chhuahsan tura duhtu pawh tam mah se nimin tlai khan Erik Ten Hag-a'n a cham tur thu a sawi. A hlawh tam ber an chhuahtir dawn loh avangin transfer tawp niah Man United thawm a nat loh phah ang.

Man United hian right back an la duh belh a, Barcelona defender Sergino Dest an duh. Amaherawhchu English club hian Dest lalut tur chuan Aron Wan-Bissaka an chhuahtir a ṭul dawn a, hun a tep ter tawh avangin English right back hi a chhuak dawn lo.

Man United hian Tyrell Malacia, Christian Eriksen, Lisandro Martinez leh Casemiro te an lakluh hnuah forward Antony leh goalkeeper Martin Dubravka te an lalut leh dawn. Transfer tawp niah thil danglam an la thlentir thei bawk.

Mamawh ngah Chelsea
Chelsea-in transfer tawp hmaa an match hnuhnung berah Southampton 2-1 in an hneh lo a, Thomas Tuchel-a hoten khelmuala result ṭha zawk nei turin transfer tawp niah thapui an chhuah ngei a rinawm.

Blues hi Pierre-Emerick Aubameyang nen sawizawm an ni a, Barcelona-in Arsenal striker hlui hi chhuahtir duh mah se a man an chhiar san deuh avangin London club nen inremna an la nei thei lo. Auba hian Chelsea pan a hreh lo a, chutihrualin Stamford Bridge pan tur chuan club pahnihin inremna an neih a la ngai. Club pahnih hi Marcos Alonso chungchangah an indawr tel bawk.

Amaherawhchu Auba hi a chenna in an rawk ṭumin rukru nena an inbeihnaah a khabe ruh a khi a, kar thum tal a chawlh a ṭul dawn. Hei hian transfer-ah nghawng a nei thei ang.

Chelsea hian loan hmangin Callum Hudson Odoi chu Bayer Leverkusen-ah an chhuahtir a, Christian Pulisic erawh chhuahtir an remti lo. Blues hian tlarhnung thuam chak nan Leicester City defender Wesley Fofana chu nmin tlai khan lakluh fel thu an puang a, an lak belh zel dawn em, tih chu vawiin hian a hriat ang.

Man City-ah Akanji
Manchester City manager Pep Guardiola-a'n Barcelona nena sawizawm Bernardo Silva chhuah loh tur thu a sawi chiang tawh a, Thawhlehni khan transfer-ah player an lak belh tawh dawn lo tia ngaih theih turin ṭawngkam a nei.

Mahse, City-in tlarhnungah inhliam vanga buaina an neih avangin defender thar an lak belh dawn. City hian defence laia khel thei tur Ruben Dias, John Stones, Aymeric Laporte leh Nathan Ake te an kawl. Laporte hi hliam vangin tun season-ah a la inlan lo a, Ake hi a inhliam leh bawk.

English club hi Borussia Dortmund nen defender Manuel Akanji chungchangah inremna an nei hnai a, Switzerland international hi euro maktaduai 17.5 man bawr vel tura ngaih a ni. He thu i chhiar meuh chuan Akanji hi City player a ni tawh hial ang.

Liverpoool-ah midfielder?
Liverpool manager Jurgen Klopp-a'n media hmaah midfielder an mamawh thu a sawi a, Reds-in midfielder an la dawn em, tih chu zaninah a chiang ang.

German manager Klopp chuan, "Midfielder lak kan tum a, kan lak tumin club dang a zawm. Player ṭhenkhat lak chhuah theih an ni lo a, thutlukna pawimawh siam a ṭul. Mimal ngaihdanah chuan risk lak a châkawm ka ti a, mahse thutlukna siamtu ka ni lo," tiin midfielder lakluh a duh thu a sawi.

Klopp hian squad tih chak nan midfielder a duh a, Reds hian midfielder an mamawh tih pawh a chiang a, mahse club thuneituten an laksak ang em, tih hi thil chiang a ni lo a, laksak tum pawh ni se lak tur an awm lo thei bawk.

Everton hi
Frank Lampard hnuaiah Everton-in chak an la nei lo a, nipui transfer-ah player pathum la thei dinhmunah an la ding. Toffees hian PSG aṭangin an player hlui Idrissa Gueye laklet tumin hma an la mek a, Senegalese midfielder hi an la thei a nih chuan midfield a chak sawt thei ang.

Everton hi Man Untied-a khelhna hmun chang lo James Garner lalut turin an dinhmun a ṭha viau bawk. Garner hian season liam ta khan Nottingham Forest-ah loan hmanga khelin Premier League a kaipui a, tun season-ah khelhna hmun chan ngei a duh a ni. Toffees hian Anthony Gordon an chelh ngei a rinawm tawh a, chutihrualin tlarhma tichak turin forward an la melh bawk.

Zanin/Naktuk zingah transfer a tawp dawn
Premier League September 2, Zirtawpni (3:30 AM)
La Liga September 2, Zirtawpni (3:30 AM)
Serie A September 1, Ningani (8:30 PM)
Bundesliga September 1, Ningani (8:30 PM)
Ligue 1 September 2, Zirtawpni (3:30 AM)