Set hloh mah se Nadal a chak

Rafael Nadal chuan US Open 2022 a match hmasa berah fiahna a hmachhawn nghal. Spanish star hian wildcard hmanga inlan Rinky Hijikata lakah set hmasa ber hloh mah se a tho chhuak a, darkar thum leh minute riat chhungin a chak let thei.

Nimin zing Flushing Meadows, New York-a inkhelah Nadal hian 4-6, 6-2, 6-3, 6-3 in hnehna a chang a, season kal laia Grand Slam match a khelh tawhah vawi 20 a chak tling ta chiah, chak loh a nei miah lo.

Australian Open leh French Open nomawi a chawi a, Wimbledon semifinal lutin a inlan thei lo thung. US Open-ah hian tun hmain vawi li a champion tawh, tun ṭumah hian a vawi nga nan hlawhtlin a tum dawn - Fabio Fognini nen an intum leh ang.

Kum 36 mi Nadal chuan, "Flushing Meadows-a ka inkhelh hnuhnung ber aṭanga chhut khan ni 1,087 lai a liam hman, tunah ṭha taka ka inkhel leh thei ta hi ka lawm hle," a ti, kum 2019 hnua a vawi khat nan USTA Billie Jean King National Tennis Center-ah a inkhel ve leh chauh a ni.

Nimin zinga first round inkhel dangah Carlos Alcaraz pawh a chak. Nadal ang bawka Spanish player Alcaraz hian Sebastian Baez chu 7-5, 7-5, 2-0 in a hneh. Argentina player Beaz hian hliam vangin set thumna a khel zo thei lo.

Kum 19 mi Alcaraz chuan, "Hetianga inkhel a tawp hi chu tumahin an duh ngai lo, hliam vanga inhnukdawk Baez kha ka tawrhpui hle," tiin a sawi a, a match lehpekah chuan Federico Coria nen an inhmachhawn leh dawn a ni.

Inkhel dangah Andrey Rublev chuan set hnih hloh mah se hnehna a chang tho a, thleng sang thei tur zinga mi - Jannik Sinner, Hubert Hurkacz, Marin Cilic, John Isner, Denis Shapovalov leh Frances Tiafoe te pawhin an match hmasa berah hnehna an chang vek.