Chak duhna thinlung kan neih zel a ṭul - Ten Hag

Manchester United chuan zanin dar 12:30 hian King Power Stadium-ah Leicester City an lenchilh dawn. Erik Ten Hag-a hote hi match hnih an chak zawn tawh a, Dutch manager hian record duhawm hi chhunzawm zel a duh.

Ten Hag chuan, "Tun hi kan bul ṭanna tur a ni a, season ṭha tak neih kan duh a nih chuan chak duhna thinlung kan neih zel a ṭul," tiin a sawi.

Foxes nen an inkhelh hunah hian Anthony Martial a la khel thei dawn lo a, Ajax aṭanga zawm tur Antony pawh document la tih fel loh avangin chhawr theih tur zingah a la tel lo.

Chutihrualin Real Madrid aṭanga an lakluh Casemiro erawh bul ṭan thei dinhmunah a ding. Dutch manager hian nimin khan Cristiano Ronaldo chhuah loh tur thu a tichiang a, Portugal captain hian bul a ṭan thei bawk.

Leicester City-in Chelsea lakah defender Wesley Fofana an chân a, a thlakna tur atan Reims aṭangin Wout Faes an la dawn. United an hmachhawn hun atan malpui hliam vangin James Maddison dinhmun a chiang lo a, Ricardo Pereira leh Ryan Bertrand te chhawr theih an la ni lo bawk.

Brendan Rodgers-a hote hian chak an la nei lo a, match hmasa bera Brentford nen 2-2 a an inhnehtawk hnuah Arsenal, Southampton leh Chelsea te an hneh lo.