Roma tan Paulo Dybala a inlar

Paulo Dybala chuan AS Roma-in an lak chhan a tihlawhtling mek zel, khelmuala hmuhnawm taka a chet vel bakah goal a khung. Argentine forward hian Thawhlehni zan khan Monza lakah goal hnih a khung.

Dybala bakah Roger Ibanez chuan goal khat khungin AS Roma hian 3-0 in hnehna an chang a, Serie A match li aṭanga point 10 hmuin table hmahruaitu an ni, an hnuaiah hian point kua neiin Inter Milan an awm thung.

Italian league lian inkhel dangah champion lai AC Milan chu Sassuolo nen 0-0 in an inhnehtawk a, champion tum zinga mi Inter Milan chuan an mikhual Cremonese lakah 3-1 in hnehna an chang thung - nomawi inchuh tur team an intiattawk hlawm hle.

Hma lam a thlir
Juventus tana contract a hman zawh hnuin Dybala-a'n Roma a pan a, Stadio Olimpico-ah beiseina a sang. An beisei ang ngeiin goal hmasa pahnih a khung, Italian football inelna sang berah hian goal 100 a khung tling ta chiah bawk.

Kum 28 mi Dybala chuan, "Goal khung châk hian ka tuihal reng a, a hun a rawn thleng ta chu ka lawm hle. Team hmasawn lai leh indinthar kan ni a, chuvangin player ṭhenkhat chu kan la khel ho tam tawk lo hle.

"Season tir chauh a la nih avangin kan nih tur ang takin kan la ni thei lo, hun a kal leh hret ang a, chumi hunah chuan kan ṭha zual ngei ang," tiin a sawi a, an coach Jose Mourinho chungah rinna an nghah ngam thu a sawi tel bawk a ni.

Milan chak zo lo

Serie A nomawi kawltu an ni a, team boruak a ṭhat bawk avangin an lakah beiseina a sang ṭhin. Mahse, Milan hian an duh ang ngawtin thil an ti kaltluang thei bik lo, khualmuala Sassuolo nen inhnehtawk turin vanneihna an mamawh hial.

Sassuolo tana Domenico Berardi-a penalty pet chu AC Milan goalkeeper Mike Maignan chuan a lo dansak hlauh a, lut ni ngat se la chuan sut an harsat viauin a rinawm. Stefano Pioli naute hian tlawm la nei lo mah se match hnih chu inhnehtawk an nei ta.

Zlatan Ibrahimovic lo kir hun tur a hriat loh a, striker tawnhriat nei ṭha Olivier Giroud chuan bul ṭan thei tawh mah se a la hriam tawk lo, season hmasa lama team chandamtu a nihna a la tinung leh thei lo, tlarhma lamin hna an tlin rih lo a ni.

Inter an puitling
Lazio an ngam loh hnuah Inter Milan chu Cremonese lakah 3-1 in an tho chhuak leh nghal. Joaquin Correa, Nicolo Barella leh Lautaro Martinez te chuan Nerazzurri ten hian goal khat ṭheuh an khung a ni.

Inter manager Simone Inzaghi chuan, "Cremonese hmachhawn hi a awlsam lo, an theihna zawng zawnga khel ṭhin an ni. Anni laka point thum hmuh theih hi chu a ṭha, a bik taka Laizo laka kan chak loh hnua kan tho chhuak leh nghal hi a lawmawm.

"A nihna takah chuan Inter lakah mi beisiena a sang ṭhin, an beisei ang tihlawhtling turin kan puitling tawh bawk. Squad erawh thuam chak deuh kan la ngai, tlarhnung laia khel thei player dang chu kan la mamawh belh," tiin a sawi.