Werner-a'n hattrick a siam

Chelsea striker duh loh Timo Werner chuan Thawhlehni zan khan DFB Pokal first round-ah hattrick a siam a, RB Leipzig-in Teutonia Ottensen chu 8-0 in an sawp.

German Cup-ah hian RB Leipzig hi champion lai an ni a, first round-a an khingpui hi fourth division club an nih avangin chak turin harsatna an tawk lo.

German forward Timo Werner hian first half-ah hattrick a siam fel der a, seocnd half-ah assist a nei leh bawk. Leipzig tan hian Andre Silva-a'n goal hnih a khung bakah Emil Forsberg, Christopher Nkunku leh Dani Olmo ten goal khat ṭheuh an khung.

Kum 26 mi Werner hian kum 2020 khan Chelsea a zawm a, London club tan hian season hnih chhungin Premier League-ah match 56 khelin goal 10 chiah a khung. German forward hian Leipzig tan season tinin goal 10 aia tam a khung bakah season hnihah goal 20 aia tam khung a neih avangin beisei a pha lo hle.

Tun season-ah Werner hi a larchhuahna RB Leipzig-ah a kir a, match li a khelh aṭangin goal li a khung leh der tawh a, assist vawi hnih a nei leh tawh bawk.