Everton tana goal khungtu Gordon

Chelsea hel lai Anthony Gordon chuan Everton tan goal a khung leh ta a, London club chil put a tizual - mahse, a club erawh hnehna a chanpui zo chuang lo a, an mikhualna ramah Leeds United nen 1-1 in an inhnehtawk.

Everton hian minute 17-na lekah goal hmahruai an khung a, an goal hi goal mawi bik a ni - Gordon-a ball khalh lai chu Luis Sinisterra-a'n lo khawih pensak mah se Dwight McNeil ke bulah a tla a, Burnley aṭanga Everton pantu hian Alex Iwobi a pe lehnghal.

Iwobi hian Illan Meslier-a kap karah pet lut zuiin, ṭha taka tlan lut Gordon chuan harsatna nei loin goal-ah a chantir zui a, Everton goal khung dan hian coach Frank Lampard-a lung a dum khawp ang.

Mahse, Leeds-in mahni mualah tlawm an duh lo - minute 55-naah Sinisterra chuan Premier League-a a goal hmasa ber khungin si phurh a sut a, hun tawp thlenga goal dang lut loin team pahnih an inhnehtawk.

Nipui transfer-a Feyenoord aṭanga Leeds pantu Sinisterra hian season hmasa khan Dutch club tan inelna hrang hrangah match 49 khelin goal 23 a khung a, Leeds-ah pawh tlangnel turin hun a duh rei lo.

Colombian winger hian kar hmasa lawk khan League Cup-ah Leeds tana a goal hmasa ber a lo khung tawh a, English club a pan hnuah match nga khela goal hnih khung tawhin, assist vawi khat a nei a, pound maktaduai 21 man player hnathawh atan chuan a la ṭha rih hle.

Hetihlai hian Leeds leh Everton ten inkhel an thlirlet ang a, chak thei ve veah an inngai ang - Leeds tan Jack Harrison, bench aṭanga luhtir Joe Gelhardt leh Brenden Aaronson ten chance duhawm an nei a, mahse, Jordan Pickford khelh ṭhat zan an tawn avangin an vannei tawk lo.

Everton-in chakna chance nei lo erawh an ni bik lo - Amadou Onana leh Nathan Patterson te vanneih zan a ni lo a, Demarai Gray goal khung chu video assistant referee hmanga ennawn a nih hnuah pawmsak an ni lo bawk.

Leeds tan Southampton laka a inhliam hnuah Patrick Bamford lo kir leh mah se, tun season Premier League match nga a khelh aṭanga goal li khungtu Rodrigo chu hliam vanga lakchhuah a ngai a, he thu buatsaih a nih lai hian a hliam dinhmun sawi theih a la ni lo.

Everton-in an beisei point thum hmu lo mah se, tlarhnung laia Conor Coady leh James Tarkowski inkawp chuan danglamna a siam tih chiang takin a lang - goal khung erawh an la harsat chhunzawm zel.

Gordon-a'n goal khung mah se goal khung tur dang Merseyside club hian an nei ṭha tawk lo - Dominic Calvert-Lewin a la inhliam mek a, Brighton aṭanga an lakluh Neal Maupay chu lehkha tihfel hman a nih loh avangin Leeds lakah a inlan thei lo bawk.

Hetihlai hian match zawna goal khung tawh Gordon a chhuak dawn lo niin a lang a, Chelsea-in pound maktaduai 60 thlenga an ngam anga sawi forward hi Lampard chuan a chhuah loh tur thu a sawi.