Mitrovic-a'n goal 100 khung tling ta

Eng club tana khel pawh ni se, eng ram league pawh ni rawh se - goal khung thei bik hi chu an awm. Aleksandar Mitrovic pawh hi goal khung thei bik zinga mi a ni, a club Fulham tan goal 100 a khung tling ta.

Thawhlehni zan Premier League inkhelah Motrovic hian goal hmahruai a khung a, season kal laia league goal nga a khungna niin, a team hi an mikhual Brighton & Hove Albion lakah 2-1 in hnehna a chanpui.

Brighton captain Lewis Dunk chuan anmahni lamah a tilut palh a, penalty aṭangin Alexis Mac Allister chuan goal khat khung ve bawk mah se awmzia a nei thui lo, khualmual aṭangin point an sual chhuak zo lo.

Fulham manager Marco Silva chuan, "Mitrovic hian goal khung tura a mamawh chu inrintawkna chiah a ni, chu chu a la nei zui. Goal tam tak a khung tawh a, a ti thei a ni tih kan hriat avangin a lak aṭang hian goal tam zawk hmuh pawh kan la inbeisei," a ti.

Season hmasa khan Mitrovic hian Cham-pionship match 44 aṭangin goal 43 a khung a, English football inelna sang pahnihnaah season khata goal khung hnem record a ni hial. Premier League-ah pawh match nga aṭangin goal nga a khung der tawh.

Serbian striker chuan, "A chang chuan goal kan khung mai theih loh chang a awm ṭhin, chutiang hunah chuan mimal chauh ni loin team pumpui kan thawhrim zual a ngai ṭhin. Tun ṭumah pawh hian point thum hlawh chhuak tur hian kan bei nasa hle," a ti.