Mizo rider ten Coimbatore an mawi

JK Tyre - FMSCI National Racing Championship vawi 20-na chu Inrinni leh Pathianni khan Kari Motor Speedway, Coimbatore-ah neih a ni a; Red Bull Rookie Cup leh Suzuki Gixxer Cup-a inlan Mizo tleirawl - Lalhruaizela, Lalnunsanga, Mal­sawmdawngliana leh Lal­mawi­puia ten podium an lawn phak.

Inelna ṭan a nih hmain ruah a tla a, kawng a huh avangin kum 2003-a siam circuit, 2.1km a thui an tlan chhungin rider an fimkhur tlang hle.

Road to Rookie Cup
Road to Rookie Cup (Kum 12-16) second round-ah hian India ram pum aṭanga rider thlan chhuah ṭha bik 13 an intlansiak. Lap 8 an tlan hnuah Bawngkawn rider Lalhruaizela chu pahnihna a ni a, a hnungah Electric Veng rawlthar Lalnun­sanga a thleng bawk.

Pathianniah khawṭha tak hnuaiah race 2 neih leh a ni a, Lalhruaizela chu pahnihnaah thlengin Lalnunsanga erawh palinaah a thleng.

Round hmasa ang bawkin race 1 leh 2 ah hian Mizo rider pahnih hmaah Jaden Gunawardena a thleng leh a ni. Sri Lanka rider Jaden hi Red Bull Cup tlan tura tling sa a nih avangin point pek a ni ve lo a, hei vang hian Mizo rawlthar Hruaizela hian points 38 hmuin table chung berah a awm; September 1-3 hian third round tlan leh tur a ni a, a chesual palh a nih loh chuan India aiawh turin a dinhmun a siam ṭha tawh hle.

Gixxer Cup
Kum 16 chung lam inelna Suzuki Gixxer Cup-ah rider thlan bik 16 an inel, qualifying a pakhatna Malsawmdawngliana chu lap hnihna an tlan laiin a bike a chhiat avangin a tlanzui thei lo a; pahnihna aṭanga bul ṭantu Lalmawipuia chuan lap hnihna kawng kawiah harsatna tawk mah se podium lawn turin pathumna dinhmun a luah phak.

Pathiannia neih race 2-ah Malsawmdawngliana hnuhnung ber aṭangin bul ṭan mah se lap riat an tlan hnuah pahnihna dinhmun a luah a, pathumna aṭanga bul ṭantu Lalmawipuia erawh palina a ni thung.

Thlan bik
June 10 khan Tuirial Air­field-ah Road to Rookie leh Suzuki Gixxer Cup selection round hi neih a ni a, rider 105 zet inlan aṭangin Road to Rookie atan rider pariat leh Gixxer Cup atan rider pali thlan an ni.

Selection round hi intlansiak pangngai anga neih a ni lo a, bike khalh dan ngun taka thlir niin corner lak dan, gear shift timing leh endikna hrang hrang hmangin hrual tlak tura ngaih talent nei ṭhate an thlang chhuak.

Inelna buatsaihtu lam hian India ram hi hmun liah ṭhenin Aizawl hian East Zone a thleng. Aizawl bakah hian Southern Zone (Bengaluru), Northern Zone (Noida) leh Western Zone (Pune) lamah te selection round hi neih a ni.

Zone tin aṭangin rider pali zel lak tura ruahman a ni a, mahse Mizo rider chet danah beiseina an neih san avangin an ruahman aia tam final round tlan turin an thlang.

Round hmasa lam
Final round hi vawi thum tlan tur a ni a, a thawh khatna chu July 8-9 khan neih a lo ni tawh. Hemi ṭum hian Coimbatore-ah Suzuki Gixxer Cup neih niin Bawngkawn tlangval Lalmawipuia chu pathumna a ni a, Kanan veng tlangval Malsawmdawngliana chu palina a ni bawk.

JK Tyre, Road to Rookie Cup-ah Bawngkawn rider Lalhruaizela chu pahnihna niin a hnungah Mizo tlangval dang K. Lalnunsanga, Electric Veng (3pos), PC Andy Lalhma­ngaihsanga, Rulchawm (4), Vanlalthlamuana, Salem Veng (5), Lalneihtluanga, Salem Veng (6) leh Augustine Lal­tlankima leh Lalrinliana, Melriat te an thleng.

Engtin zel?
Inelna hi round hnuhnung ber a la awm leh dawn, Road to Rookie Cup hi final round pawh Coimbatore-ah neih vek tur a ni a, Gixxer Cup erawh November 17-18 hian Buddh International Circuit, Noida-ah neih leh tura ruahman a ni.

Round tinah hian intlansiak vawi hnih zel a awm a, khaw­vela bike intlansiakna sang ber MotoGP point an pek dan angin point pek zel an ni. Suzuki Gixxer Cup huangah hian champion chuan Suzuki Gixxer SF a dawng dawn a, pahnihna tan Gixxer Naked niin pathumna chuan Scooter Lets a dawng thung ang - pakhatna aṭanga pathumna lawmmanah hian sum fai ṭhahnem tak a tel vek bawk.

Road to Rookie Cup cham­pion leh pahnihna te chu Spain-a neih tur Red Bull Rookies Cup-a inlan turin qualifying an tlan thei ang. Red Bull Rookies Cup hi 250cc class niin MotoGP nena thlunzawm a nih tawh avangin European leg zawng zawngah an tlan ve vek dawn a ni. Mizo rider-te tan kawng a inhawng mek a, chu­tihrualin a ler thleng tur erawh chuan hmabak a la tam hle.

Eng nge an sawi?
JK Tyre Motorsport mana­ger Rohit Kumar chuan Mizo ṭhalai ten racing-ah talent an neih ṭhat thu a sawi a, "Chiang takin ka sawi thei rih lo, selection round nei leh turin Aizawl kan rawn kal lehna chance chu 90% a chiang tawh," tiin Vanglaini a hrilh.

MiMSA vice preisdent Lal­fakzuala Hauzel chuan, "Mizo ṭhalai ten an theihna tak an lantir theihna tura inelna buatsaih tu chungah kan lawm a, inelna an hmachhawn theih nana thathawhtu hrang hrang Mizoram States Sports Council leh Sports Minister bakah rider nu leh pate chungah lawmthu kan sawi," tiin Vanglaini a hrilh bawk.

(JK Tyre - FMSCI National Racing Championship vawi 20-na hi Vanglaini reporter Lalthansanga chuan a hmunah a chhim a ni)