Vijender Singh dang thei an awm lo
Indian boxer Vijender Singh chuan professional boxing a luhchilh hnuah ngamtu a la tawng lo - Inrinni zan khan Chinese boxer Zulpikar Maimaitiali nen an inhmachhawn a, unanimous decision 96-93, 95-94, 95-94 in hnehna a chang.
Vijender-a'n Zulpikar a hmachhawn hmain match riat a khel tawh a, hnehna a chang vek. Chinese boxer lakah pawh zahngaihna a lantir chuang lo, a zawna a vawi kua nan hnehna a chang leh ta - Indian boxer hian WBO Asia Pacific Super Middleweight title a kawl sa bakah WBO Oriental Super Middleweight title a neih belh tihna a ni.
Remna pualin...
Indian tlangvalin khawtualah Chinese tlangval ngamin hnehna hlado a chham khum a, Vijender Singh chuan tun hnaia ramria buaina nei reng India leh China inrem theih nan a title chu a hlan thu a sawi.
Kum 31 mi boxer chuan, "India leh China inṭhianṭhat nan ka title hi ka hlan a ni. Ramria ram pahnih buaina hi social media leh hmun hrang hrang aṭangin ka lo hmu a, a thlamuanthlak loh takzet. Vawiina ka title hlawhchhuah hi mipui, remna leh inṭhianṭhatna atan ka hlan," a ti.
Chinese product
Khawvela thil siamchhuah lamah China an lar a, an thil siam daih rei loh avangin fiamthu thawh nan hman ṭhin an ni fo bawk. Vijender pawhin hei hi Zulpikar nen an inhnek hmaa fiamthu thawh nan hmangin, "Chinese product daih rei tak ka la hre ngai lo," a ti.
Mahse, Inrinni zana round 10 thleng an inhnek meuh chuan Vijender-a'n a ngaihdan a thlak a, "Fight ṭha tak a ni a, khatiang em ema a daih rei kha ka ring lo. A chang chuan China kut chhuak pawhin rei an lo daih ve tho a nih hi!" tiin a sawi.