Team 4-in hmun ruak 1 inchuh Dinthar Vs India Under 19; Ramhlun North Vs BVT
Great Sports I Day Football Group A aṭangin Aizawl FC-in hmahruaitu ni chungin semifinal an lut tawh a, vawiin hian I League club hnungzuitu tur zawnna neih a ni dawn. Lammualah match hnih khelh a ni ang a, team pali tan semifinal luh dan kawng a awm vek.
Vawiin chhun dar 12:15 hian point thum hmu tawh pahnih Dinthar FC leh AIFF Under 19 te an inkhel ang a, tlai dar 2:30-ah point li hmu tawh pahnih Ramhlun North FC leh Bethlehem Vengthlang FC te an inkhel bawk ang.
AIFF U19 ṭha zawk?
AIFF Under 19 chu nikum khan a vawi khat nan I Day Football-ah an rawn inlan a, coach Floyd Pinto-a'n ṭha zawka an rawn let leh tur thu a sawi. Kuminah India rama rawlthar ṭha rual thlan khawm team-te hi Lammualah an rawn inlan leh a, player-te an inhriatchian bakah an chak lohna lai player thar an inlak belh avangin team ṭha zawk an ni.
Amaherawhchu AIFF Under 19 hi match thum khelh zawhah tla thei dinhmunah an ding a, team dang result-ah an innghat.
Floyd Pinto hote hi kum hmasa lam aiin ṭha zawk mah se tualchhung football club-in hma an sawn avangin an beisei ang result an hmu lo - chak an la nei lo.
Chutihrualin India U 19 te hian match thum an khelh tawhah hneh loh an la tawng lo a, an draw vek a, point thum an hmu tawh a ni.
Dinthar nen
India Under 19 leh Dinthar FC inkhela chak zawk an awm a nih chuan, a chak zawk hi semifinal lut thei an ni phawt ang. Amah-erawhchu Ramhlun North leh Bethlehem Vengthlang FC te inkhel an ngaihchan a ṭul dawn. Group A match hnuhnung bera chak zawk an awm loh (draw) chauhin AIFF U19 leh Maimawms inkhela chak zawkin semifinal an lut ang.
India U19 coach Floyd Pinto chuan, "Semifinal chauh ni loin final thlenga lut thei kan la ni. Kan duh chu ṭha taka khelh a, point thum hmuh a ni. Kan chungah vanneihna a awm ngei ka beisei," tiin Vanglaini a hrilh.
State pawn team tan hian Mizo player-te bawk an che ṭha a, AIFF Under 19 goal hnih khung tawh chu Ramhlun South rawlthar Lalawmpuia (OP-a) khung sak a ni. Dinthar FC player hlui OP-a bakah hian captain Edmund Lalrindika chu player hmuhnawm a ni a, tlar hnunga awm Lalliansanga'n hmabak êng tak a nei a, midfield-ah Zonunmawia, Lalengzama Vangchhia leh B. Lalnuntluanga te an ṭangkai viau bawk.
India U19 khingpui tur Dinthar FC hi table mawngphaha awm mek ni mah se Lalhlupuia Sailo kaihhruai team hian an match hnuhnung berah semifinal lut tawh Aizawl FC an hneh a, vawiina an inkhelh hma hian ni li hahdamna hun an nei bawk.
Maimawms tana thu lawmawm chu an Nigerian striker Jackson Victor Ogheneochuko chu team tichak thei tur a ni.
Jackson hi Kerala, Guwahati, Pune leh Kolhapur-ah te a inkhel tawh ṭhin a, midfield-ah Clarence Carter an neih bawk avangin semifinal pawh thleng se inelna tihlu theitu tur an ni. Tlar hmaah Michael Lalremruata, Samuel Laltlanthanga leh Lalnunsanga te an kawl bawk a, AIFF Under 19 tlarhnung tan inven uluk a ṭul ang.
Quarterfinal chu...
Tlai dar 2:30-a Ramhlun North leh Bethlehem Vengthlang aṭang hian semifinal lut an awm a rinawm zawk mah a, a chak zawkin semifinal an luh chian avangin quarterfinal tih theih a ni.
Lalruatliana Sailo kaihhruai Ramhlun North-in kawng awlsam zawh aiin kawng harsa an thlang a tih theih - Aizawl FC lakah point khat hlawh chhuak se I League club aia dinhmun ṭha zawk tur an nih laiin point an hmu thei lo. Vawiinah erawh duhthlan tur a nei dawn lo a, ṭan phat aṭangin sa huai serin player ṭha rual an lut nghal ang.
Forward Lalliansanga'n (Notea) match thum khelh tawhah goal khat ṭheuh a khung a, BVT tan ven uluk a ṭul dawn. Amaherawhchu BVT tan pakhat chauh ven theih a ni dawn lo - Nigerian pahnih Oneyeama Francis leh Olaniran Joseph Segun bakah tawnhriat nei ṭha Lalrinfela leh V. Lalchhuanawma te an la awm.
BVT FC-in game mawi an khel thei a, match hmasa pahniha goal khung ve vetu B. Zoramthara'n AIFF Under 19 lakah penalty a hlah. Coach Chawngthansanga tana thu lawmawm chu Thara'n penalty khung lo mah se Vanlalthanga'n goal a khung a, MFA Super Cup-ah goal khung harsat deuh mah se I Day Football-ah erawh match thum an khelhah goal an khung vek.
Coach Chawnga chuan, "Foreigner an neih laiin kan nei ve lo, chu ti chung chuan kan intluk viau chuan ka hria. India ram hmun dangah pawh foreigner lak hi an intih hmuh a, Mizorama kan ching chho hi a lawmawmna lai a awm rualin ṭha lo lai pawh a awmin ka hria. Kan lakluh tam tak e kan tluk lohna chu tharum a ni mai a, hetah pawh hian kan hnaih viau tawh a ni," tiin Mizo player-te a rintawk thu a sawi.
BVT-in Lalsangzuala Hmar kaihhruaina hnuaiah kum 2015 khan I Day Football final an lut a, he mi hnu hian knockout stage an la lut leh lo. Team pahnih tan semifinal lut turin risk lak a ṭul dawn a, coach tawnhriat nei ṭha lanna hun a ni ang.
Group A - Team Dinhmun
July 28, Zirtawpni - Rajiv Gandhi Stadium
Aizawl FC 2 - 1 Bethlehem VT FC
AFC : Lalrinzuala Khiangte 18'; Kareem Omolaja 58'
BVT : B. Zoramthara 28' (P)
Dinthar FC 1 - 4 Ramhlun North FC
DFC : Samuel Laltlanthanga 78'(P)
RNFC : C. Ramdinmawia 41' ; Lalliansanga 45';
Oneyeama Francis 84', 90+1'
July 31, Thawhṭanni - Lammual
Bethlehem VT FC 1 - 0 Dinthar FC
BVT : B. Zoramthara 67'
AIFF Under 19 0 - 0 Aizawl FC
August 2, Nilaini - Lammual
AIFF Under 19 1 - 1 Ramhlun North FC
AIFF : Lalawmpuia 78'
RNFC : Lalliansanga 1'
Dinthar FC 2 - 1 Aizawl FC
DFC : Lalbiakhlua 27'; Lalnunsanga(Talea) 90+2'
AFC : Kareem Omolaja 16'
August 4, Zirtawpni - Lammual
Aizawl FC 2 - 1 Ramhlun North FC
AFC : Rochharzela 20'; Kareem Omolaja 59' (P)
RNFC : Lalliansanga 64'
Bethlehem VT FC 1 - 1 AIFF Under 19
BVT : Vanlalthanga 48'
AIFF : Lalawmpuia 56'
Vawiin inkhel tur - lammual
12:15 PM Dinthar FC vs AIFF Under 19
02:30 PM Ramhlun North FC vs Bethlehem VT FC
# Team Pld W D L GF GA GD Pts
1 Aizawl FC 4 2 1 1 5 4 1 7
2 Ramhlun North FC 3 1 1 1 6 4 2 4
3 Bethlehem VT FC 3 1 1 1 3 3 0 4
4 AIFF Under 19 3 0 3 0 2 2 0 3
5 Dinthar FC 3 1 0 2 3 6 -3 3