Bolt-a'n umphak loh a tawng

7th August, 2017

Infiammi ropui berte zinga mi Usain Bolt chuan 2017 World Championships-a 100m inelnaah pathumna dinhmun chauh a hauh phak. Pathianni zinga inelna neihah Jamaican sprinter hian American sprinter pahnih Justin Gatlin leh Christian Coleman te a tluk lo.

Olympic Stadium, London-a intlansiak hi khawvelin a ngaihven a, a chhan chu khawvela tlan chak ber Bolt-a tan mimal intlansiak hnuhnung ber a nih vang a ni. Kum 30 mi Bolt hian World Championships zawh hian intlansiak khawvel a chawlsan dawn a, tunah chuan 4x100m chiah hmabak a nei ta.

Pawm thiam harsa

Bolt hi 2007 World Championships-ah 4x100 m relay-ah pahnihna an ni a, hemi hnu hian Jaimaican sprinter hian inelna lianah hneh loh a tawng tawh lo.

100m leh 200m bika Bolt-a record chu WWWW, DSQ (false start), WWWWWWWWW a ni a, he record duhawm tak belhchhah tur hian 100m (9.58 sec) leh 200m (19.19 sec) chelhtu a ni. Hei vang hian Jamaican sprinter hi khawvel ṭan rawn a ni a, a hun tawp pawh L (loss) ni loa W (win) a khar ngei turin an duhsak.

Amaherawhchu Pathianni zing intlansiakah hian Bolt hi 9.95 second-ah thlengin Galtin (9.92 sec) leh Coleman (9.94 sec) te a pha lo. Jaimacan sprinter thawnthu tawpna lungchhiatthlak zawnga her danglamtu Galtin hi damdawi hman phal loh ṭum hnih hmang tawh a nih avangin entu mipuiin an 'boo' hial.

Bolt a puitling

Kum 30 mi Bolt chuan, "Khawvel hmaah infiammi ropui ber zinga mi ka ni tih hi ka fiah tawh a, tuna ka result hian engmah a thlak danglam lo. Infiammi ka nihna angin ka hna ka thawk zo a, infiamna hi ka chawi sang a ni. Theihtawp ka chhuah a, ṭantu ka neih ṭhat bawk avangin lungngai lutuk tur chu ka ni lo e," tiin a dinhmunah a lungawi.

London stadium-a entu mipui 56,000 in an auh el rawn Galtin chhanzuiin Bolt chuan, "Ka lawmpui thu ka hrilh a. Hun harsa a paltlang tawh a, a duhthusam hun chu a nghak chhuak ta. Chak phu zawk a ni," tiin puitling takin chak lo zawk a ni tih a pawm.

Bolt hian 100m hi 9.95 sec-ah chauh a thleng a, major final-a tlan muan ber ṭum a ni. Jaimaican sprinter hian kum nga liam ta khan Olympic Games-ah tuna inelna neihna hmunah tho hian 9.63 sec-ah a thleng a, hei hi Olympic record a ni.