Adam Lallana a inhliam

Liverpool midfielder Adam Lallana chu a malpuiah hliam a tawrh avangin thla hnih tal a chawlh a ngai dawn a, Reds tan chuan thu hriat nuam a ni hauh lo ang. English midfielder hian Audi Cup final-a Atletico Madrid nen an inkhelh ṭumin hliam hi a tuar a, endik a nih hnuah thla hnih tal a chawlh a ngaih dawn thu sawi a ni ta a ni.

Reds manager Jurgen Klopp chuan, "August leh September-ah chuan Adam hmuh hi inbeisei loh a fuh zawk dawn a, he thu hi tumahin hriat nuam kan ti lo," tiin Reds chuan an player pawimawh tak tel loa season bul an ṭan tur chu an huphurh thu a sawi.

England tana vawi 33 inlan tawh midfielder hian hliam a tawrh takah chuan England manager Gareth Southgate-a tan chanchin lawmawm a ni chuang lo. September-a World Cup qualifying match Malta leh Slovakia nen an khelh hunah a inlan thei dawn lo.

Hetihlai hian Reds hian pre-season a an match hnuhnung ber chu Inrinni zan khan an khel a, Athletic Bilbao chu 3-1 in an hneh. Pre-season hmang ṭha tak Reds hian August 12 zana Watford nen an league match hmasa ber an khelh hunah inrintawkna nen Premier League bul an ṭan theih a beiseiawm.

Liverpool tan Roberto Firmino chuan penalty aṭangin goal hmahruai a khung a, Spanish club-in Inaki Williams hmanga an sut ve lehnghal avangin goal khung zat inangin chawlhlawk hman a ni. Mahse, second half-ah Reds tan rawlthar duhawm pahnih Ben Woodburn leh Dominic Solanke ten goal khat ve ve khungin Liverpool hi a chak zawkah an ṭang ta a ni.