ATK striker thar Robbie Keane

Indian Super League champion lai Atletico de Kolkata chuan a zawna nomawi chawi ngei an tum tih pholangin Irish legend Robbie Keane an lalut.

Tottenham Hotspur striker hlui hian nikum November khan Major League Soccer club LA Galaxy a chhuahsan a, ATK hi USA a chhuahsan hnua a club hmasa ber a ni dawn tihna a ni.

Kum 37 mi striker chuan, "England leh USA-a club ṭha ber ber tan ka khelh tawh avangin vannei ka inti takzet a, ram tan inelna lian thamah ka inlan fo tawh bawk. Vawiina ka dinhmun

aṭanga chhutin league thar leh Asia khawmualpuia nunphung ka la tem ngai loh hmachhawn tura pen chhuah hi ka châk tlat a, Indian Super League champion ATK ka zawm thei hi ka lawm hle. Rim taka thawkin he club

ṭantute hlimna leh lawmna ka thlen belh zel ka beisei," tiin India chu beiseina sang tak nena pan a nih thu a sawi.

Spurs-a season khat chhung Keane nena lo khel dun tawh leh tuna ATK manager ni bawk Teddy Sheringham chuan, "A thiamna leh hun harsaah pawh zam hauh loa a khelh theihna hi eng team tan pawh hlawkpui tham a ni. Robbie kan neih tawh avangin kan tlarhma chu an hlauhawm sawt dawn tih a chiang a, hetihrual hian Indian player-te pawhin a hnen aṭangin thil tam tak an zir ka beisei," a ti.

Republic of Ireland tan match 146 a inlan aṭanga goal 68 khung thei Keane hian club langsar tak tak Inter Milan, Leeds United, Tottenham Hotspur, Liverpool, Celtic, West Ham, Aston Villa leh LA Galaxy tan a lo khel tawh a, Spurs-ah a hming a chher ber. London club tan hian match 306 khelin goal 122 a khungsak a, White Hart Lane aṭanga Liverpool a pan hma 2007-08 ah khan Spurs tana a season duhawm ber hmangin match 54-ah goal 23 ngawt a khung.

Kum 2011-ah David Beckham te nena khelho turin LA Galaxy lam a pan a, USA club tan hian match 165 khelin goal 104 ngawt a khung bawk.

Tun nipui transfer-ah pawh Keane hi English club Birmingham City, a lo khelh tawhna club pahnih Leeds United leh Wolverhampton Wanderers pawhin lakluh tumin hel mah se ATK-a kal a thlang zawk.

Keane hian Kolkata club-ah hian kar khatah £50,000 a hlawh dawn nia sawi a ni a, ATK-in heti zat hlawh an pek theih chhan hi hlawh atana sum hman theih chin vaibelchhe 18 huang chhungah khan marquee player dah tel an nih loh vang a ni. Marquee player bikah hian hlawh pek theih zat bituk a awm lo.