Bayern kutah DFB Super Cup

Bayern Munich-in DFB Super Cup la turin vanneihna an mamawh a, Inrinni zan khan Bavarians hian Borusssia Dort­mund lakah an siphurh ṭum hnih an sut hnuah penalty shoot­out-ah 5-4 in hnehna an chang. Italian coach Carlo Ance­lotti hnuaiah Bayern-in kum zawnin DFB Super Cup an chawi ta.

2-2 phawt

Signal Iduna Park-ah Borussia Dortmund-in Peter Bosz hnuaia an match hmasa ber an khel a, mualneitu hian an khingpui an nawr ngamna rah sengin Christian Pulisic chuan Bayern defender Javi Martinez ball a chhuhsak hnuah goal hmahruai a khung a, minute 12 chiah a la ral hman.

Amaherawhchu minute ruk hnuah Joshua Kimmich cross duhthusam chu Robert Lewandowski-a'n goal-ah a chantir a, Bundesliga champion-in an siphurh an sut. Bavarians an chungnung zawk a, Dortmund goalkeeper Roman Burki chu fiahin a awm ngun hle.

Second half-ah Ajax boss hlui Bosz-a'n German mid­fielder Sebastian Rode a luhtir a, team pahnih an inhnehtawk a, goal chance pawh an nei ve ve. Minute 71-naah Pierre-Emerick Aubameyang-a'n goal khungin a vawi hnih nan Borussia-in hma an hruai a, chakpuina goal tur niin lang mah se minute 88-naah BVB wing back Lukasz Piszczek-a'n an lamah a tilut a, 2-2 in an inhnehtawk.

Penalty shootout

Bayern Munich-in an first keeper Manuel Neuer an chhawr thei lo a, Germany no. 1 keeper aia lut Sven Ulreich chu Bavarians chhandamtu a ni.

Kum 29 mi Ulreich hian Sebastian Rode leh Marc Bartra pet a dang a, hemi hma hian minute 90 chhunga khel ṭha em em Bayern player Joshua Kimmich-a'n penalty a hlah a, Bosz-a naute aiin Carlo Ancelotti hote an vannei zawk.

Bavarians tan hian Robert Lewandowski, Franck Ribbery, Sebastian Rudy, Arturo Vidal leh Niklas Sule ten an khung a, Dortmund tan hian Ousmane Dembele, Maximilian Philipp, Aubameyang leh Gonzalo Castro ten an khung ve bawk.

DFB Super Cup khelh zan hian season liam taa Bundesliga Rookie of the Season-a an thlan French rawlthar duhawm Dembele chuan chawimawina a dawng.

A naute ringtu Ancelotti

Bayern Muncih boss Carlo Ancelotti chuan, "Nomawi hi a pawimawh a, DFB Super Cup kan lak avangin ka lawm. Kan khelh dan tur hrechungin kan khel char char thei a, pre season-a kan theih loh a ni. Season thar atan hlauhthawnna tur a awmin ka hre lo a, Bundesliga ṭan a nih hunah chuan a dik thlap tawh ang," tiin a sawi.

Bayern hian an player hlui Hasan Salihamidzic chu spor­ting director-ah an ruat thar a, kum 40 mi Salihamidzic chuan, "Vawi hnih goal kan chhuah hnuah kan tho leh thei a, kan rilru put hmang a lang. Pre season-a kan result avangin coach leh player-te nen pawh kan inbe ngun a, Bayern tan chuan chak loh reng a thiang lo. Tunah chuan hnehna kan chang a, Bayern tih atana mawi a ni," tiin a lungawi thu a sawi ve bawk.

German champion hian Super Cup-ah keeper Neuer bakah Thiago Alcantara, Arjen Robben, Jerome Boateng, James Rodriguez, David Alaba leh Juan Bernat te an chhawr thei lo a, pre season match rukah vawi nga an chak loh bawk avangin Super Cup-a Borussia Dortmund hneh hi result lawmawm a ni.

Kar hnih hnuah

Bundesliga hi August 18, Zirtawpni zan aṭangin khelh ṭan a ni dawn a, hemi zan hian champion lai Bayern hian Allianz Arena-ah Bayer Leverkusen an hmachhawn nghal ang. Borussia Dortmund erawh khualmualah an zin chhuak dawn a, August 19, Inrinni zanah Wolfsburg nen an inkhel ang.

Bayern hian tun season-a an competitive match hmasa ber chu Chemnitzer FC nen an khel dawn a, August 12 zana inkhel tur hi DFB Pokal first round a ni. Dortmund pawhin hemi zan vek hian Rielasingen an hmachhawn ve bawk dawn.

Tute nge khel?
Dortmund : Burki; Piszczek, Bartra, Sokratis, Zagadou (Passlack 77'); Sahin, Castro, Dahoud (Rode 46'); Dembele, Pulisic (Philipp 90'), Aubameyang
Bayern : Ulreich; Rafinha, Hummels, Martinez (Süle 60'), Kimmich; Vidal, Rudy, Tolisso (Sanches 84'); Muller (Coman 67'), Ribery; Lewandowski