Delhi-ah Argentine striker a lut

Indian Super League club Delhi Dynamos chuan Argentine striker Juan Leandro Vogliotti an lakluh thu an puang. Kum 32-a upa striker hian season hman zawh takah khan Bolivian top division club Sports Boys Warnes tan a khel a, match 36-a inlanah goal 21 khungin league-a goal khung hnem ber dawttu a ni.

Juan Vogliotti hian an ram club Sportivo Belgrano, Independiente, Cipolleti, Sportivo Atenas leh Villa Cubas tana a khelh hnuah kum 2014 khan ram pawn lam hawiin Colombian club Patriotas tan a khel a, kum 2016 khan Sports Boys zawm lehin tunah chuan Delhi club a zawm leh ta.

'The Chico' tia hriatlar, striker tharum ngah tak chuan, "Delhi Dynamos-a chona thar ka hmachhawn thei tur hi ka lawm takzet a, India rama ka zinkawng zawh tur hi ka zawh châk tawh takzet a ni. Goal tam thei ang ber khung ka tum ang a, kan hmabak match-a hnehna chang zelin Indian Super League nomawi hial kan chawi theih ka beisei," tiin beiseina sang tak nena Delhi club pan a nih thu a sawi.