Monaco chak nghal; Mbappe a inhliam
Zirtawpni zan khan French Ligue 1 match hmasa ber khelh a ni a, champion lai AS Monaco chuan hnehna an nghal - hetihrual hian transfer bazar-a player 'hot' ber pawl ni mek Kylian Mbappe chu hliam vanga lakchhuah a ni a, a hliam erawh hlauhthawnawm a nih loh thu manager Leonardo Jardim chuan inkhelh zawhah a sawi.
Monaco khelmual Stade Louis II-a inkhelah mikhual team Toulouse an tlangnel zawk a, minute rukna lekah Zinedine Machach hmangin goal hmahruai an khung. Monaco-in Brazilian defender Jemerson hmangin an si phurh sut nghal mah se Toulouse bawkin Andy Delort hmangin hmahruaina goal an khung nawn.
Champion lai Monaco-in chak lo chunga league match hmasa ber hman an duh lo a, Radamel Falcao chuan a thiam ngaiin a la thiam reng tih pholangin si phurh sutna goal a khung. An khel rei telh telh a, mualneitu an hriat tawlh tawlh.
Poland centre-back Kamil Glik chuan minute 70-naah hmahruaina goal a khung ta nge nge a, mikhual team-in a chhanletna tur an neih tawh loh avangin Monaco an chak.
Mbappe dinhmun
Hun tawp nan minute 15 chiah a awm tawh tihah Mbappe a inhliam a, khelmual chhungah enkawlna pek a nih hnuin thlak a ni. French striker chungchangah a tirah hlauhthawnna awm mah se Monaco coach Jardim chuan a player dinhmun a ṭhat thu a sawi.
Jardim chuan, "Ni hnih emaw ni thum hnu lawkah Mbappe hian ngai a awh leh ang," tiin thu lawmawm a sawi a, hriatthiam harsa erawh Monaco ṭantute nge Mbappe heltu club-te lawm zawk ang? tih hi a ni.
Manchester mikhual Mbappe
August 4 zanah Mbappe-a'n Monaco tan inkhel bul a ṭan a, a tukah chuan Manchester khawpuiah hmuh a ni. Kum 18 mi striker hian England a pan chhan erawh mimal sponsorship chungchangah a ni a, media-te chuan amah rimtu Manchester City nen an sawi zawm tel bawk.
City-in pound maktaduai 160-a lakluh an tum nia sawi Mbappe hian City forward Leroy Sane nena an thlalak dun chu twitter lamah a tarlang a, sawi zui a hlawh hle. City hian Monaco-a Mbappe khelhpui ṭhin midfielder Bernardo Silva leh defender Benjamin Mendy chu a belhkhawma pound maktaduai 95-in an lo lalut tawh bawk.
Mizoram hmeichhe team an tla
Mizoram Junior Girls team chuan nimin khan Delhi 4-0 in an hneh lo a, Junior Girls National Football Championships aṭangin an tla.
Cuttack-a inelna neihah hian Mizoram hi Group A-ah Sikkim, Andhra Pradesh leh Chhatisgarh nen an awm ho a, group stage-ah hnehna chang vekin Andhra phei chu 10-1 in an sawp.
Amaherawhchu Mizoram hian quarterfinal-ah Delhi an ngam lo a, beisei tur an nei tawh lo. Inelna hi August 10, 2017-ah zawh fel a ni ang.