A zawna vawi nga chak Arsenal

Arsenal tih leh 'chak' a inzawm rih tlat - Premier League match nga an khelh tawh chinah Arsenal an la chak vek! Mikel Arteta naute hian Pathianni zanah Manchester United an hmachawn zui dawn, boruak a sang khawp ang.

Gunners hian Nilaini zan inkhelah Aston Villa 2-1 in an hneh a, striker thar Gabriel Jesus leh forward Gabriel Martinelli ten goal an khung. North London club an lawm viau laiin Villa manager Steven Gerrard tan chuan a mang chhia chhunzawmsaktu mai an ni.

European league lian panga - Premier League, La Liga, Bundesliga, Serie A leh Ligue 1 khel zingah Arsenal leh Real Madrid te chauh tun season kal laia chak vek thei an ni a, an record hi eng chen nge an hum theih ang tih erawh hriat a ni lo.

Jesus bawk
Emirates Stadium-a inkhelah hliam vangin Thomas Partey leh Oleksandr Zinchenko te an la inlan thei lo a, defender Kieran Tierney chuan bul a ṭan. Match hmasa lama an chhawr Mohamed Elneny a hliam bawk avangin Albert Sambi Lokonga kan hmu thung.

Arsenal inkhel a nung leh nghal hle, na takin Aston Villa tlarhnung an nawr - mahse an keeper hlui Emiliano Martinez an paltlang thei mai bik lo, chawlhlawk hma deuhin Argentina international hian Granit Xhaka-a shot pawh a dansak.

Mahse, ball per hi striker Jesus chuan laklawh nei miah loin a lo khung, a awmna tur hmun a thlan dik vang a ni. Jesus-a'n EPL bikah goal 49 a khung tawhah a team lamin chak loh an nei ngai lo, a record bakah an khelh dan thlirin point thum a hminah a ngaih theih a ni.

Corner aṭangin
Arsenal lam duh ang ngawt chu a ni bik lo, second half-ah Aston Villa tlarhnung a phui a, ball chang tlem zawk ni mah se an inveng thei viau. Gerrard-a'n minute 73-naah McGinn la chhuakin Douglas Luiz a dah lut.

Brazilian midfielder Luiz hian corner an hmuh a pet chhunzawm a, goal-ah a pet lut daih! Arsenal lamin goal luh theih nan Boubacar Kamara chuan keeper Aaron Ramsdale a tibuai niah a ngai, mahse VAR hman hnuah goal hi an pawm tlang.

Villa lamin point an hmu dawn niah an inngai, mahse counter attack aṭangin Gunners an hlauhawm. Box chhungah Bukayo Saka-a'n chiai loin a pass tur a thlang dik a, ven loha awm Martinelli a pe - ani hian Martinez dan theih lohin a khung.

Gerrard a nghawng
Ropui takin Rangers a kaihruai a, chona thar hmachhawn turin Aston Villa a enkawl. Villa Park a pan tirh lamah result a nei ṭha a, a lakah beisiena pawh a sang, mahse season hmasa chawhnu lam aṭangin a zuih.

Tun season Premier League match nga an khelh tawhah Gerrard-a enkawl Villa hi vawi li an tlawm, tun kar tawpah champion lai Manchester City an hmachhawn zui leh dawn, hna a hautak dawn takzet.

Gerrard chuan, "Ka hna hi a ṭha thei ang bera thawh chhunzawm ka tum," tiin a sawi a, an result chhia chuan a hma hun a ti chiang lo tih erawh a pha lo. English manager hian Man City a hneh a nih chuan a boruak a danglam leh daih thei thung.

Beiseina chu
Season ṭan dawn khan Arsenal hian an league match hmasa pangaah hnehna an chang dawn, tiin sawi ila - mi tam zawk chuan thu atthlak niah an ngai ang. Mahse, 2004-05 season hnua a vawi khat match hmasa pangaah an chak tlat.

Arsenal manager Arteta chuan, "Goal chhuah hi chu inkhelin a ken tel a ni, a tir lam leh goal kan chhuah hnua kan beih dan kha chu ṭha tak a ni. Engtik lai pawhin hnehna chan duhna thinglung hi chu kan nei tur a ni ang," a ti

Spanish manager hian Premier League bakah kar leh lama an khelh tur Europa League a ngaihtuah tel a ngai dawn a, kar tawpa Old Trafford an pan hunah erawh chak tumin a player neih ṭhat ang ang a chhawrin a rinawm.