Premier League Club Bihchianna Man Utd - Ryan Giggs leh tlarhma player-te

Premier League club history-a record nei ṭha lawr lak Manchester United-in sulhnu an nei ṭha bawk a, player langsar pawh an ngah. United ropui theih nan Sir Alex Ferguson-a'n tha a thawh hlawk a, Premier League title 13 a lakpui. Scottish manager-in club enkawl hna a chawlhsan hnuah Red Devils hian league nomawi an chawi tawh lo.

Statistics hmanga player thur chhuah tur a nih chuan Ryan Giggs hming a langsar ber a, chutihrualin captain ropui pahnih Eric Cantona leh Roy Keane te pawh an hnathawh a ropui hle. Class of 92 ang zawng pawhin chanchin ngaihnawm tak a awm thei ang. Chutihrualin ṭum khatah ziah vek sen a ni lo a, tun ṭumah erawh Giggs chanchinah insawrbingin United tlarhma chanchin tlem belh a ni bawk.

Premier League ṭan hnua player ropui bera chhal ngam Ryan Giggs hian kum 23 zet Manchester United tan a khelh hnuah football hian kum 2014 khan football khelh a chawlhsan thu a puang.

Giggs hian kum 40 a nih thleng a inkhelh hnuah Old Trafford chhuahsan mai loin Louis van Gaal puitu zingah a tel a, tunah erawh Wales manager niin an ram Euro 2020 khel turin a tlinpui - a la ropui zel.

Kum 46 mi Giggs hi a thiam a, a vannei tel bawk. Player thiam tak, thiamna bika teha amah aia sang turte pawh an awmna club a fuh loh avangin champion nomawi thlalakpui mang loa chawl ta an tam hle. Giggs erawhin champion nomawi lian tham 34 a dawn mai piah lamah kum 23 chhung a inkhel thei - a club zawm a fuh a, a club khelh ṭhat vanglai leh a vanglai a inang hi a vannei hle a ni.

Teh dan hrang hrang awm mah se, football-a 'hlawhtling' an tih chu season tawpa champion hi an ni. Giggs hi a champion ve nual! Premier League-ah vawi 13 a champion a, hei hi record a ni. FA Cup-ah pawh ṭum li a champion a, League Cup-ah ṭum thum champion bawkin Champions League-ah pawh vawi hnih a champion. Hei bakah hian UEFA Super Cup, Intercontinental Cup leh FIFA Club World Cup-ah vawi khat ṭheuh a champion bawk.

Footballer-in club football-a a tawn theih ang chi hi chu a tawng kim vek a ni ber a, mimal chawimawina pawh a dawng nual. PFA-in Young Player of the Year-ah a zawnin vawi hnih an thlang a, Player of the Year-ah vawi khat an thlang bawk. Hei bakah hian mimal chawimawina chi hrang hrang a dawng nual.

Football khawvel hi sumin a chim buai zo tawh a, 'player rinawm' pawh awm hleithei tawh loin sum tamna lam panin an chhuak nasa hle - Giggs erawh sawmna tam tak hnawlin Old Trafford-ah a hun a hmang zo.

1990-a Manchester United-a trainee ni tura a inziah luh aṭanga tun season-a Old Trafford-a an game hnuhnung bera a tlan luh thlengin Man United kawr chiah a ha. United tan match 963 a khel a, goal 163 a thun.

Giggs-a ropuina an sawi uar em em chu a 'tlo' hi a ni. Kum 40 a ni tawh a, he ti chung hian season zawh takah khan Champions League-ah bik United 'innghahna' tih theih deuhthawin a la khel ṭha thei.

Sir Alex Ferguson phei chuan, "He pa hi a mak a nih hi... a kum telin a ṭha tawlh tawlh emaw tih mai tur a ni. A taksa a enkawl dan hi football khel ṭhin zawng zawngte tan entawn tur a ni," a ti hial. Giggs hi amah a invawng uluk a, a taksa tana ṭha lo tur a hnar ngam a, hei vang hian kum 40 a nih thlengin team tichaktu a la ni thei.

Chutihrualin club football a khelh rei duh avangin Giggs hian kum 2007 khan ram tana inkhelh a chawlhsan thu a puang. Wales mipui chuan ram hmangaih tawk loah an ngai a, an ram team a enkawl tirh pawhin insawifiah a ngaih phah hial. Amaherawhchu, Manchester United chhuan tawlawl Giggs hi Wales player ropui zinga mi a ni tho tho.

Manchester United chanchina goal khung tam ber chu Wayne Rooney a ni a, league-ah ringawt goal 183 a khung. Derby County tana khel mek Rooney hi player danglam bik a ni a, Everton aṭanga bul ṭanin Arsenal vanglaiin ṭum hnih an record a tih tawpsak.

Rooney hian theihna sang tak a nei a, amaherawhchu Cristiano Ronaldo vanglai nen an hun a intawn avangin a thlawptu zawkah a ṭang a, a ropui tur angin a ropui ta lo tih pawhin a sawi theih. United-in tlarhma an nei ṭha ṭhin hrim hrim a, 2008-a Champions League an champion ṭum pawhin Ronaldo, Rooney leh Carlos Tevez te an kawl a, mimal tih hian football khawvel tan sulhnu ṭha tak an hnutchhiah vek.

United ṭantute tam tak lunglenna erawh kum 1999-a treble champion-a player-te kha an ni a, Yorke-Cole combination kha Ronaldo leh Rooney te angin mimalin ropui lo mah se team ang chuan Europe-a roreltu an ni. Dwight Yorke leh Andy Cole te kha rinrawl niin Teddy Sheringham leh Ole Gunnar Solskjaer ten khelhna hun an neih ang an hmang ṭangkai ṭhin hle.

Kum 48 mi Yorke kha Trinidad and Tobago-a khaw pakhat Canaan-ah November 3, 1971 khan a piang a, khawvel striker ṭha zingah a tel pha. Yorke hian kum 1989 khan Aston Villa zawmin English Football-ah hming a chher a, United-ah season li chauh hun a hmang chungin a sulhnu a langsar hle.

Yorke thlawptu Andy Cole hi October 15, 1971 khan Nottingham-ah a piang a, Arsenal youth academy chhuak niin Gunners tana hmun a chan loh avangin Bristol City-ah bul a ṭan a, Newcastle United-ah hming a chher. Kum 1995 khan Manchester United a zawm a, season riat khelin league match 195-ah goal 93 a khung.