Man United-in Antony an pho chhuak ta

Manchester United-in Ajax aṭanga pound maktaduai 82 senga an lakluh Antony chu nimin khan an pho chhuak. Brazilian winger manah hian United-in euro maktaduai 95 (£82m) an pe phawt ang a, a chet ṭhat dan a zirin euro maktaduai nga (£4.3m) in a pung leh thei ang.

Kum 22 mi Antony hian kum 2027 thleng daih contract a ziak a, kum khat pawhsei leh theih dan a awm bawk. Antony chuan, "Hma kan sawn zel theih nan Erik ten Hag hnuaia khelh hi duhthusam a ni a, a khelh duh dan hian ka ṭhatna ber a pho chhuak. Manchester tana hma thlir min hrilh khan minti phur a ni," tiin a sawi.

Brazilian winger hian kum 2020 khan Sao Paulo aṭangin Ajax hi a zawm a, Dutch club tana khelh ṭantirh aṭangin Ten Hag-a hnuaiah a awm. Antony hian Ajax tan match 82 khelin goal 24 a khung a, assist vawi 22 a nei bawk.

Europe-a club inelna sang ber Champions League-ah pawh Antony hi a rintlak a, match 11 a khelh aṭangin goal sarih a khung. October 2021 khan Brazil tan koh ṭan a ni a, ram tan match kua a khelh aṭangin goal hnih a khung a ni.

Man United hian tun nipui bazarah Antony bakah hian defender Lisandro Martinez, midfielder Casemiro, full back Tyrell Malacia leh playmaker Christian Eriksen te an lalut tawh bawk .

Ten Hag-a'n Old Trafford-a thuneihna a chelh hnuah pound maktaduai 210 chuang a seng tawh a, chutihrualin Paul Pogba, Jesse Lingard, Juan Mata, Nemanja Matic, Edinson Cavani leh Andreas Pereira te a chhuahtir.

Dutch manager hian player an lakluh dan chu duthusam ni lo mah se a ṭhat thawkhat thu a sawi a, player duh thlan tur a neih tawh thu sawiin thlasik bazar hmain a mamawh tur tihchian a tum thu a sawi tel bawk.