Haaland tan Premier League a awlsam!

Khawvela league harsa ber anga sawi ṭhin Premier League-ah Erling Haaland tan harsatna a awm lo a, Norwegian striker hian English top flight league-a a season hmasa berah match nga khelin goal kua a khung tawh!

Nilaini zan khan Manchester City chuan an mikhual Nottingham Forest chu 6-0 ngawtin an sawp a, Haaland hian hattrick a siam - a zawnin Premier League-ah hattrick a siam tihna a ni.

City tan striker thar Julian Alvarez chuan goal hnih khung bawkin, Joao Cancelo chuan goal khat a khung ve bawk a, kai thar Nottingham tan champion lai City an sang hret a ni ber.

A hming Haaland
Forest boss Steve Cooper-a'n City dan tumin 5-3-2 formation rem mah se goal chhuah turin hun an mamawh rei lo - minute 12-na lekah Haaland chuan goal hmahruai a khung nghal a, Phil Foden-a ball thlawh luh a khung dawnin Forest tlarhnungin an veng zo ngang lo a ni ber.

Borussia Dortmund striker hlui hi a phur laklawh a, insum a tum lo. Goal a khung aṭanga minute 11-naah goal hnihna a khung a, minute 38 a thlen meuh chuan goal thum a khung fel der tawh!

City-in chawlhlawkah 3-0 in hma an hruai a, second half-ah goal thum an khung zui. Minute 50-naah Cancelo chuan chiang zetin a pet goal a, a tira post pet pertu Álvarez chuan ngaihthah a thiang lo tih pholangin goal hnih a khung bawk.

Haaland a thiam
Pep Guardiola kaihhruaina hnuaiah City inkhel a hmuhnawm ṭhin a, movement mawi tak karah ball an in pass hnem avangin, penalty box-a hun tam zawk hmang ṭhin Haaland hi Etihad Stadium-ah a hlawhtling kher ang em, tih chu zawhna pakhat a ni.

Mahse, kum 22 mi striker hian insiamrem turin hun a mamawh lo - a movement rang tak, ball hmu tura a tlan dang fing tak, a chakna leh finishing tawih lutukte chu mit titlai an tling.

A goal hmasa ber khung tura a tharum ngahzia sawi hmaih a rem lo a, a goal hnihna khung tura City movement mawi takah a inrawlh a, a goal thumna a tauh luh dawnin striker awmna tur takah a lo awm bawk.

Haaland faktu Pep
Norwegian striker Haaland hi Premier League match-a a zawna hattrick siam thei pasarihna a ni a, Tottenham Hotspur striker Harry Kane chu vawi khat aia tam hattrick a zawna siam thei awmchhun a ni.

Haaland-a khelh danin City fans lung a tiawi a, an legend Segio Aguero hming thlengin an lam ri. City boss Pep chuan, "Sergio kha legend a ni a, club tana goal pawimawh tak tak khungtu a nih avangin City fan-te thinlunga hmun a chan thuk dan hi engmahin a thlak danglam lo ang.

"Mahse, Erling hian chu level thleng tur chuan theihna a nei a, Norway, Austria leh Germany-a a hnathawh kha he hmunah pawh hian thawh leh a tum a ni. Mahse, a mizia ka hriat ve dan enin, nomawi kan chawi loh chuan record-ah ringawt a lawm ang em aw, ka ti," tiin a sawi.