Liverpool-in chak turin vanneihna an mamawh

Bournemouth laka goal kua khungtu Liverpool-in Newcastle United lakah chak turin vanneihna an mamawh a, hun pek belh minute riatnaa Fabio Carvalho goal khung hmangin 2-1 in an chak hram.

Anfield-ah Magpies tan Alexander Isak chuan goal hmahruai a khung a, a club thar tana a match hmasa berah goal a khung nghal - Liverpool nen an inkhelh hma lawkin a visa a fel ve chauh!

Mahse, Anfield-a inkhel an ni miau a, Liverpool-in tlawm an tum lo - Roberto Firmino chuan si phurh a sut a, rawlthar duhawm Carvalho chuan minute 98-naah chak nemnghehna goal a khung bawk.

Liverpool-in league match nga an khelh aṭangin vawi hnih hnehna an chang ve ta a, kawng dik an zawh leh ṭan ta - Inrinni zanah Merseyside derby khel turin Everton an lenchilh zui dawn a, hmabak hautakin a hmuak.

Magpies an khawng
Liverpool-in Bournemouth lakah goal kua zet an khung avangin inrintawkna an nei a, an phur vanglai tak a nih avangin Newcastle United tan record an neih ṭhat lohna hmun Anfield-a lenluh a châkawm lo.

Mahse, Eddie Howe hnuaia insiamṭha Magpies hi an tumah an chiang - tlarhnung venhim a, chance neih huna vuak let chu an tum dan ber a ni a, chumi tur chuan player pawh an nei.

Liverpool player-ten an duh angin ball an inpe fuh hleithei lo a, goal khung tum viau mah se Magpies player-ten an hnaih chilh zung zung zel avangin an che hleithei lo a, Mohamed Salah meuh tan pawh 'Salah' nih a harsa!

Inkhela chance hlauhawm hmasa bera chhal ngam chu Luis Diaz ke bulah a tla a, mahse, Colombian forward hian Firmino ball pek ṭha zet chu goal ruakah a khung thei lo.

A goal ta
Liverpool-in goal khung tumin nawr reng mah se chance pangngai tak insiam an harsat a, Newcastle zawkin an khung hmasa ta nge nge - Reds captain Jordan Henderson ball dan per chu Sean Longstaff ke bulah a tla a, Isak tan a siamsak zui.

Hendo hian Isak hi a um zui tur nia a lan laiin a tawlh hnung zui a, Swedish forward vengtu Fabinho a tlan chhuak thung - Isak a 'free' phah a, pound maktaduai 60 man forward hian Magpies jersey nena a goal hmasa ber a khung.

Goal dang lut loin chawlhlawk hman zui a ni a, Anfield thawm a reh. Isak bawk chu kan hmuh hmasak a ni a, kum 22 mi forward hian goal hnihna a khung - mahse, assistant referee-in offside flag a phar a, Isak hi a dar a offside hman niin a lang.

Minute 61-naah Reds-in si phurh an sut ta nge nge a, Salah siamsak chu Firmino chuan 'cool' zetin goal-ah a chantir - Liverpool an phur thar a, goal dang erawh an nei lawk thei chuang lo!

A tawpah vanneihna
Liverpool tan Harvey Elliott a hmuhnawm a, Thawhlehnia kum 20 tling ve chiah midfielder hian a khel ṭha viau chungin a team tan chance hlauhawm tia sawi tur erawh a siam hleithei bik lo.

Newcastle-in an player pawimawh Allan Saint-Maximin, Bruno Guimaraes leh Callum Wilson an chhawr thei lo chungin an khel ṭha takzet a, Anfield-a draw result neih chu an tan result ṭha a tlin avangin hun lah an khawhral hnem!

Mahse, hun pek belh minute riatnaah Liverpool an vannei - Magpies tlarhnungin hmun danga an rilru an pek zeuh chhawrin Fabio chuan chance a nei a, Anfield-a pan hnua a goal hnihna ni turin ṭha zetin a khung a, Liverpool an chak daih.

Anfield thawm a ring a, Magpies player-te an hawihai thung - Liverpool fan-ten hun khawhral nasa Newcastle player-te stadium an chhuahsan laiin an au el zui a, boruak chu sang tak a ni.

Liverpool & beiseina
Reds manager Jurgen Klopp chuan, "A ropui thlawt - hun rei tak chhung chu he result hi kan hre reng tawh ang. Ka player-te zawng zawng khan a tawp thlengin beiseina an nei tlat em, ka sawi ngam lo.

"Mahse, tun aṭang chuan a tawp thlenga kan beih zel a ngai tawh dawn - a tih theih tih kan pholang tlat alawm," a ti a, chawl loa an beih vanga chak an nih thu a sawi.

Liverpool lawm erawh a kim lo - Hendo chu malpui hliam vanga lakchhuah a ngai. Chutihrual chuan bench-ah Joel Matip leh Curtis Jones te hmuh tur an awm leh tawh a, Diogo Jota-a'n club training a zawm tawh a, Darwin Nunez chuan hremna a tuar zo ta bawk.

Magpies boss Howe chuan, "First half-ah kha chuan kan khel ṭha. Anfield-ah 1-0 a hma kan hruai chuan inkhel thununtu kan ni zui dawn lo tih a hriat a, pressure paltlang tura paukhauh a ngai - Liverpool laka tlarhnung ven a harsa êm a ni," tiin inkhel a thlirlet.