Manchester City-in Akanji an lalut

Manchester City chuan tlarhnung thuam chak nan Borussia Dortmund aṭangin defender Manuel Akanji chu euro maktaduai 17.5-in an lalut. Switzerland defender hian kum nga daih contract a ziak.

Kum 27 mi Akanji hian January 2018 khan Basel aṭangin Dortmund hi a zawm a, German club hian match 158 khel tawhin hmun pawimawh a chang.

Amaherawhchu tun season-ah Dortmund-in Germany international defender pahnih Niklas Sule leh Nico Schlotterbeck te an lalut a, tun season-ah a la inlan loh avangin English club hi a pan ta zawk.

Man City hian centre back rintlak pali Ruben Dias, John Stones, Aymeric Laporte leh Nathan Ake te nei sa mah se tumah an chhuah dawn lo. French defender Laporte hi hliam vangin tun season-ah a la inlan lo a, Ake hi ṭhal hliam vangin Nottingham Forest 6-0 a an sawp ṭum pawhin squad-ah a awm lo.

Hei bakah hian kum tawpah FIFA World Cup khelh a nih dawn avangin match khelh tur a tam dawn a, Pep Guardiola leh a hoten squad neih chhah an ngai pawimawhah a ngaih theih.

Man City hian Akanji hma hian tun nipui bazarah Erling Haaland, Kalvin Phillips, Sergio Gómez leh keeper Stefan Ortega te an lalut tawh a ni.