India-in Super 4 an lut

Asia Cup Super 4 lut turin India chuan Nilaini zan khan Hong Kong chu 40 runs-in an hneh. Rohit Sharma hote hian match hmasa bera Pakistan an hneh tawh bawk avangin group A pakhatna ni chungin knockout stage an lut.

Dubai International Stadium-ah Hong Kong-in vawm hmasak an thlang a, India batter-ten an theihna lantirna remchang atan an hmang.

Pakistan laka run siam lo KL Rahul-a'n 36 runs a siam a, Virat Kohli (59) leh Suryakumar Yadav (68) ten half century an siam ve ve bawk. Suryakumar hian 68 runs siam turin ball 26 chauh a mamawh.

Hong Kong tan India target chhawpsak 192/2 runs hi a tam mah mah a, chutihrualin over 20-ah 152/5 an siam tho avangin an theihna thlirin an khel ṭha thawkhatah a ngaih theih.

India leh Afghanistan ten Super 4 an lut tawh a, nizan khan Sri Lanka leh Bangladesh te inkhelin a chak zawkin knockout stage an lut dawn.

Hmunruak pakhat dang hi Pakistan leh Hong Kong ten an zawng dawn. Zanin dar 7:30 hian Pakistan leh Hong Kong te hi Sharjah Cricket Stadium-ah an inkhel ang.