Mizoram U14 team-in Delhi an pan

Subroto Cup 2022 khel tur Mizoram Under 14 team chuan nimin khan Kolasib aṭangin inelna neihna tur Delhi an pan. Covid-19 vangin inelna hi kum hnih chhung neih theih a ni lo a, inelna neih hnuhnun ber ṭum kum 2019 khan Mizoram hi an champion.

Inelna hi category pathumah ṭhen a ni a, mipa tan Sub Junior (Under 14) leh Junior (Under 17) awmin hmeichhe tan Junior (Under 17) a awm bawk. Sub Junior hi khelh hmasak ber tur a ni a, September 6 hian khelh ṭan a ni ang a, final hi September 15-ah neih a ni ang.

Mizoram team hi an champion ṭuma manager Lalthawmmawia leh coach Lalbulliana ten an ho leh dawn. SYS tirh Mizoram team-ah hian coach senior zawkin manager nihna chelhin junior zawkin coach nihna an chelh ṭhin.

Manager Mamawia chuan, "July 19 aṭangin Saidan-ah naupang an lut ṭan a, thla khat awrh training kan nei a, duhthusam chu a ni lo. Chutihrualin kan training-na anga an khel chhuak a nih erawh chuan beisei chu kan nei sang ve khawp mai," tiin Vanglaini a hrilh.