PSG tan Neymar bawk a inlar

Paris St-Germain hmatawng Neymar a hmuhnawm chhunzawm a, a ṭhiante Kylian Mbappe leh Lionel Messi te pawh Paris chakna hnar an ni leh bawk - an mikhualna ramah Toulouse chu 3-0 in an luhchhuah.

Messi-a'n player pathum kara a ball lirh luh chu Neymar-a'n a khung, an goal hnihna pawh Messi-a'n box chhunga a ball lakluh Mbappe tana a siamsak a ni, goal hnuhnung ber erawh defender Juan Bernat khung a ni thung.

Brazil international Neymar-a'n tun season Ligue 1 match ruk aṭangin goal kua a khung a, assist vawi ruk a nei bawk. Season tira hliam Mbappe pawh a dam chiang tawh, a league match hnuhnung pali aṭangin goal nga a khung der tawh.

PSG hian Inrinni zanah Nantes an lenchilh zui dawn a, kar leh hian Champions League group match hmasa atan Juventus an tum dawn. Manager Christophe Galtier-a'n a player ṭha ṭhenkhat a khek a nih pawhin a mak lo ang.

Ligue 1 champion PSG coach Galtier chuan, "Ni thum liamta mai kha chuan point hnih kan hloh, hun tepter takah match kan nei zui a, hnehna kan chang thei hi a lawmawm hle. Toulouse khan an tih tur chin an bel ṭha a, hmachhawn an awlsam lo.

"Leo-a'n assist vawi hnih a nei a, Neymar-a'n a league goal 109-na a khung, Kylian-a'n a khung bawk. Goal hnih kan neih hnuah player ka thlak, a chhan chu match khelh hmabak kan neih hnem vang a ni," tiin inkhek a ngaih thu a sawi.

France - Ligue 1
Monaco 2 - 4 Troyes
Angers 2 - 4 Reims
Montpellier 2 - 0 Ajaccio
Lyon 2 - 1 Auxerre
Strasbourg 1 - 1 Nantes
Lille 1 - 2 Nice
Marseille 1 - 0 Clermont
Lens 5 - 2 Lorient
Rennes 3 - 1 Brest
Toulouse 0 - 3 PSG