Juve chak laiin Napoli chak zo lo

Juventus an chak ve leh ta a, a zawna match hnih chhung an khingpui nen an inhnehtawk hnuah Spezia chu 2-0 in an hneh. Inkhel dangah Napoli erawh Lecce nen 1-1 in an inhnehtawk thung a, hmahruaitu nih theihna remchang an neih an bawhpelh.

Napoli an chak zawh loh avang hian AS Roma chu Serie A table chung berah an awm chhunzawm. Jose Mourinho naute hian Thawhlehni zan khan point thum an lo hmu tawh a, match li aṭanga point 10 khawl khawmin an sang ber.

Sampdoria leh Roma nen an inhnehtawk avangin Juventus-in sawisel an hlawh hman. Massimiliano Allegri naute hian an mikhual Spezia lakah erawh goal an khung hma, minute kuana lekah Dusan Vlahovic chuan goal hmahruai a khung.

Mahse, goal hnihna nei leh tur erawhin an nghah rei a ngai hle, hun tawp dawnah Arkadiusz Milik chuan an chak a nemnghet chiah. Turin club hian inkhel an thunun hneh a, an khingpui lamin target zawna pet an nei miah lo.

Hnehna an chan bakah keeper Wojciech Szczesny a dam ta chu lawmna tur a ni - mahse, an lawm chhung erawh a rei ta chuang lo. Poland international hian a vawi khat nan league match a khel ve chauh a, minute 42-naah a kerek hliam vangin thlak a ngai leh nghal.

Juve manager Allegri chuan, "Spezia kha an che rang hle a, a tir lamah kha chuan min chhaih buai angreng hle. An khel dan kan man a, kan insiamrem hnuah erawh a danglam thung. A pawimawh ber chu hnehna chan a ni a, a dawtah chuan goal kan chhuah lo kha a ni," tiin a sawi.

Italy - Serie A
Empoli 1 - 1 Verona
Sampdoria 1 - 1 Lazio
Udinese 1 - 0 Fiorentina
Juventus 2 - 0 Spezia
Napoli 1 - 1 Lecce