Bayern an chak chiang

DFB-Pokal first round-a hnehna chang turin Bayern Munich-in harsatna an tawk lo a, Nilaini zan khan third division club Viktoria Cologne chu khualmualah 5-0 ngawtin an sawp.

Bayern coach Julian Nagelsmann-a'n kartawpa Bundesliga leh kar leha Champions League an khelh tur hre ran chungin team a rem a, Inrinni zana 1-1 a Borussia Monchengladbach inhnehtawkpuitu team aṭangin player pasarih ngawt a thlak danglam.

Mahse, Nagelsmann hian player langsar Sadio Mane leh Thomas Muller erawh bul a ṭantir tho a, goal khung hmasa bertu erawh nipui transfer-a lakluh Ryan Gravenberch a ni.

Kum 20 mi midfielder hian minute 35-naah goal hmahruai a khung a, nipui transfer-a Bayern pantu tho, kum 17 mi forward Mathys Tel chuan solo goal a khung ve bawk a, 2-0 in first half a tawp.

Second half-ah Liverpool forward hlui Sadio Mane, Jamal Musiala leh Leon Goretzka ten goal khat ṭheuh an khung ve leh a, German champion hian harsatna nei loin hnehna an chang.