Serie A khelh chhunzawm an duh

Covid-19 len nasatna hmun zinga mi ni mah se Italy rama football inelna sang Serie A club-te chuan season an hman lai chu khelh zawh an duh a, tun kar aṭang hian club ṭhenkhat chuan training an nei chhunzawm ang.

Zirtawpni zan khan Serie A club 20 aiawh an inhmukhawm a, an vaiin league khelh zawh an duh. April thla chhawhnu lam khan an lo inhmukhawm tawh a, chumi ṭum pawh chuan club tam zawkin khelh chhunzawm an duh.

Italy ramah hri a leng nasa, nimin tlai thlenga tarlan a nih dan chuan hri vang hian mi 28,710 chuang an thi tawh; United States tih loah chuan ram mala an thih hnem berna hmun a ni. Mahse, tun hnaiah hri leng hian zawi muangin ziaawm lam a pan.

Club-ten beiseina an nei sang a, tun hnaiah club ṭhenkhatin khelh chhunzawm an duh lo nia sawi awm mah se vote an thlak hnuah erawh an vaiin an duh tih a lang. Serie A club 20 chuan khelh chhunzawm an duh vek, an chhunzawm ngei pawh a rinawm.

Amaherawhchu, engtik hunah nge an khelh chhunzawm dawn a, eng tiangin nge an kalpui ang tih erawh sawi theih a la ni lo. An khel zawm a nih pawhin a hmunah entu an awm lo ang, zawhna chhan theih loh a la tam hle.

Prime minister Giuseppe Conte chuan inkharkhipna dan pawh an thlah zalen hret tawh tur thu a sawi a, tun kar aṭang chuan ei tur zawrhna dawr leh dawr lian ni lem lo chu an hawng ṭan leh tawh ang. Tam tham taka mipui punkhawm erawh phal a la ni dawn chuang lo.

Football-ah erawh ruahmanna an neih sa an ti danglam rih lo. May 18 aṭangin an training thei chauh ang. Mahse, ram peng/bung ṭhenkhat erawh chuan anmahni huam chhunga club-te chu training an neih an phalsak tawh thung a ni.

Italian football federation (FIGC) chuan Serie A kaltlangpui ngei an tum a, chutihrualin an ram sorkar laipui thu an ngaihchan tel a ngai. FIGC president Gabriele Gravina chuan, "Sorkar thu kan zawm ṭha a, hma kan lak lehna turah pawh an thu kan ngaichang ang," tiin a sawi.

Inrinni khan Sassuolo chuan training an neih chhunzawm tur thu an puang a, lockdown an hman hnuah Serie A club zinga training an neih tur thu puang hmasa ber an ni; a hnu lamah - Lazio, AS Roma leh Parma te pawhin training an neih tur thu an puang zui ve bawk.

Sassuolo ruahman dan chuan training ground-ah ṭum khatah player paruk chauh an lut ang, a inhlat thei anga awmin taksa an sawi zawi bakah ball an inpe kual ang; inhnaihchilh taka ball inchuh leh insik chu tih loh tur a ni ang.

Roma chuan thuchhuah siamin, "Training neih hmain player-te hriselna dinhmun endik hmasak vek a ni ang, mitin tana ṭhatna tur a nih vang leh sorkar duhdan a nih avangin player tin inhlat taka awm tur a ni," tiin Trigoria training ground an hman tur thu an sawi.

Champion beisei mek Napoli chu an awmna ram bial 'Campania region' thuneitu ten training an phalsak tawh a, anni bakah hian hei lai ram vela awm - Sassuolo leh Roma pawh an training dawn, Bologna, Parma leh SPAL te pawhin an chhunzawm ve nghal a rinawm.

Kar hmasa tir lam khan Italy sports minister Vincenzo Spadafora-a'n football khelh chhunzawm leh an beiseina chu zimte a nih thu sawi mah se, an beisei leh rin aia hmain ball an pet leh dawn ta niin a lang.

Lombardy leh Turin-ah erawh hri a len nasat avangin club lian Inter Milan leh Juventus te chuan training neih chhunzawm an tum thu an la puang lo, theih se chu a rang lama ball pet an duh ve ngeiin a rinawm. Juve president Andrea Agnelli chuan May 18 aṭangin training neih a, June aṭanga league khelh pawi an tih loh thu a sawi.

Italian football inelna sang ber Serie A-ah hian Juventus chu roreltu an ni. Old Lady hian tun hnai season riat chhung chu league nomawi an chawi vek, kuminah pawh match 26 an khelh tawh chinah point 63 hmuin hma an hruai mek.

Khelh zat inangah Lazio chuan Juve hi point khat chauhin an phak lo a, nomawi inchuh boruak a sang dawn; pathumna Inter Milan (54 points) pawh match khata khel tlem an nih avangin ngaihthah theih ngawt an la ni lo.

French Ligue 1 leh Dutch Eredivisie te chu hri leng vangin tihtawp a ni tawh. Bundesliga chu khelh chhunzawm tumin training an nei mek. Premier League pawhin khelh zawh an duh, club ṭhenkhat chuan training an kalpui ve tawh bawk.