Auba hi chhuak thei a ni - Adams

Arsenal defender leh captain hlui ni bawk Tony Adams chuan nipui bazar hunah Pierre-Emerick Aubameyang chu chhuak mai thei a nih thu a sawi a, a club hlui hi player ṭha hralh ching an nih thu a sawi bawk.

Aubameyang-a'n season hmasa khan Premier League-ah goal 22 a khung a, tun season kal laiah pawh goal 17 khung leh tawhin; a chungah hian Leicester City striker Jamie Vardy (19 goals) chiah a awm.

Gabon international hi tun hnaiah club lian dangin an ngaihven nia sawi a awm. Spanish club ṭha Barcelona leh Real Madrid bakah an elpui Manchester United hming pawh lamrik a ni.

Adams chuan, "Club chhuahsan thei reng a ni, coach chu ni ila Aubameyang hi eng zata man to pawhin hralh lo turin ka ngen ang. Player neih sa chelh chu team din nghehna a nih bakah, ṭha tak ni tur chuan lak belh a ngai bawk. Hmasawn dawn chuan player ṭha ber chelh a ngai," a ti.

Gunners hian tun hnaiah an player ṭha - Alexis Sanchez, Alex Oxlade-Chamberlain leh Robin van Persie te chu English club dang lakah an hralh, tuna an striker ṭha ber pawh hi a chhuak leh a nih pawhin a mak lo ang.

English defender chuan sawi zawmin, "Tun hma lama hneh loh nei loa champion lai leh tuna team hi chu a danglam tawh hle, ka hmuh dan chuan tun hnaia club inthuamṭhat dan hi chu a ropui lem lo.

"Player ṭha hralh an ni a, a ṭha ber chelh loa an chhuah zel chuan nomawi chuh ngam khawpa team ṭha din chu thil harsa tak a ni ang," tiin a sawi. Adams hian player chelh a duh a, chutihrualin Arsene Wenger hunlai aṭang tawhin player aiin club a pawimawh zawk thu a sawi bawk.