Real Madrid-ah Marcelo a hlim

Marcelo chuan Real Madrid chhuahsan tum anga an sawina chu thu dik lo a ni tih a sawi a, Spanish club-ah a hlim vangin Santiago Bernabeu aṭanga chhuah tumna a nei lo.

Brazil international defender hian 2007 khan Fluminense aṭangin Real hi a zawm. La Liga club tan hian hlawhtlinna tam tak a chang tawh a, tun hnaiah erawh Italian champion Juventus nena sawi zawm a ni.

Zirtawpni zan khan kum 31 mi Marcelo hian instagam live-a Fabio Cannavaro nen an inbiaknaah a hma hun hi a sawi. Marcelo chuan, "Chhuah ka duh lo a, Madrid hian min chhuahtir an duh pawh ka ring hran lo.

"He hmunah hian chhungkuain kan awm a, a tir aṭanga tun thlengin hlim takin ka awm. Tun hma deuh aṭang khan mi tam tak chuan Juve pan tur angin min sawi, hei chu thu belhchian dawl lo a ni," a ti.

Marcelo hi Cristiano Ronaldo nen inkawmngeih tak an ni a. Potugal captain Ronaldo-a'n Turin club a zawm hnuah zui ve mai tur anga sawi a ni a, tunah erawh Brazil defender hian a ṭhianpa zuiin Old Lady a zawm dawn lo niin a lang.