Chhinga Veng leh goal a kal kawp

Great Sports I Day Football-ah team ṭha 10 an tel chung pawhin Chhinga Vengin match li an khelh aṭangin goal 21 an khung. Nimin khan Group A hmahruaitu Chhingcows-in state pawn aṭanga chahluh Rhino Charge chu 6-1 in an sawp.

MFA Super Cup champion Chhinga Veng FC hian August 11, Zirtawpni khian semifinal-ah Bethlehem Vengthlang FC an hmachhawn ang a, Aizawl FC leh Chanmari FC ten August 10-ah final khel tur an zawng bawk ang.

Nimin inkhel dangah beisei nei tawh lo Mizoram Police-in Chanmari West FC 3-0 in an sawp a, Ṭialthawnga hote tan hian V. Lalṭanpuia, Lalram­thar­­mawia leh F. Lalrinpuia ten goal an khung.

Goal ruk
Chhinga Vengin hmahruaitu an ni tawh avangin Rhino Charge hmachhawn turin Chanmari FC hneh ṭuma starting eleven aṭangin player pasarih zet an thlak a, chutichung chuan 6-1 in an chak.

Chhingcows tan hian Lal­dingngheta'n goal hnih khungin Malsawmfela, K. Lalthlahlova, Lalkhaw­puimawia leh Vanlal­lawma ten goal khat ṭheuh an khung a, army team hian goal nga an chhuah tawh hnuah Lalneihkima hmangin goal khat an khung ve hram.

Chhinga Veng coach Lal­sangzuala Hmar chuan, "Ka player-te hian training inang khat an dawng vek a, team A leh team B an awm hrang lo. Semifinal khel leh mai tur kan nih avangin Rhino Charge nena kan inkhel pawh hi kan la thutak a, mahni tana khel an awm zeuh zeuh erawh pawi ka ti. Team tan kan khel tur a ni," tiin an chak danah a lawm famkim lo.

Chhinga Veng an pui
Transfer laia thawm nei lian Chhinga Vengin khelmual chhungah result ṭha bik an nei chhunzawm zel a, Lalsangzuala Hmar hnathawh a ropui hle.

MFA Super Cup-ah Chhinga Veng-in match ruk khelin goal 46 tehmeuh an khung a, nomawi chawi turin Chanmari West 5-0 in an sawp. Sanga hnuaiah Chhingcows hian match 10 khel tawhin hnehna an la chang vek a ni satliah lo a, goal 67 an khung tawh.

Hei chauh hi a ni lo a, Chhingcows khingpuite hian match nga chhung a zawnin match tinah goal nga an la khung tling ziah a, an hneh zingah hian Mizoram Premier League champion lai Chanmari FC pawh an tel a ni.

Sawmfela bawk
MFA Super Cup-ah Mal­sawmfela'n goal 11 khungin top scorer a ni a, best forward atan thlan a ni. Ramhlun South tlangval Sawmfela hian I Day Football-ah goal nga a khung tling leh tawh.

Sawmfela thlawptu MS Dawng­liana leh MPL5 top scorer Laldampuia ten goal li ve ve a khung tawh bawk. Chhinga Veng FC trio Sawmfela, Dawngtea leh Dampuia ten MPL ṭan hma hauhin goal 37 an khung tawh a, an hmuhnawm chho zel ang.