Nice-ah Dutch midfielder Sneijder a kal

French Ligue 1 club Nice chuan Gala­tasaray aṭangin Netherlands international Wesley Sneijder an lalut chiang ta. Kum 33 mi Sneijder hian kum khat chhung atan free transfer-in a zawm a, nimin tlai khan team training a zawm nghal.

Real Madrid tan pawha khel tawh Sneijder hi palian tak ni lo mah se ball a thiam avangin khelmual chhungah a langsar ṭhin a, kum 2010 khan Jose Mourinho kaihhruaina hnuaiah Inter Milan chu treble champion a nihpui thei hial.

Attacking midfielder Sneijder hian Inter Milan tana a khelh pui tawh Mario Balotelli a zawm dawn. Season hmasa-a Ligue 1 pathumna Nice hian season bul an ṭan fuh lo, Inrinni zan khan an match hmasa berah Saint-Etienne chu 1-0 in an ngam lo nghal. Zirtawpni zan dar 10:30-ah Troyes an hmachhawn leh dawn a, he hunah hian Sneijder hi inkhel thei tura beisei a ni ang.