Neymar chungah Barca president lawm lo

Barcelona president Josep Maria Bartomeu chuan Paris St-Germain pana a chhuah dan chungchangah an player chhuan­vawr ni ṭhin Neymar a sawisel. Kum 25 mi forward hian kar hmasa khan French club hi khawvela footballer manto ber ni turin pound maktaduai 200-in a pan a ni.

Bartomeu chuan, "Neymar-a chhuah dan khan minti lawm lo takzet a, a khawsazia kha Barcelona player awm dan tur a ni lo," a ti. Brazil captain hi chhuak tur anga sawi thawm awm reng karah a ngawi reng a, USA an tour-na aṭanga an haw hnuah club training zawmin chhuah a duh thu a sawi a, PSG be tura phalna pek a nih hnuah ni hnih chhungin French club hi a zawm fel.

Neymar hian October thla khan Nou Camp-ah kum nga dang cham chhunzawm turin contract thar a ziak a, mahse Catalan club president chuan contract thar a ziah lai pawh khan Neymar an rinhlelh sa thu a sawi! Bartomeu chuan, "Neymar hian chhuah a la duh dawn thoa hriatna kan nei a, chuvang tak chuan leichhuah a nih theihna zat kha euro maktaduai 222-ah tisangin kan club tana ṭha tur kan ngaihtuah ran a ni,"

"Chhuah a duh ngei a ni tih kan rinhlelh pawh khan kan chi ai lo a, kan club tana ṭha turin engkim a thleng ang, tih hi kan ring thlap. Kan hnenah cham se chuan player ṭha tak kan la nei reng dawn tihna a ni a, a chhuak a nih pawhin amah thlakna tur leina sum tam tak kan nei ang. Neymar khan he club-ah hian hna ropui tak thawkin kum li chhung khan hlawhtlinna tam tak a chhar a, mahse tunah chuan a ni chu thawnthu hlui a ni tawh," a ti.

Bartomeu chuan Neymar trans­fer chungchanga lehkha pawimawhte chu Europe-a football thuneitu sang ber UEFA hnenah an thehluh tawh thu a sawi a, football-in a hlutna a hloh loh nan chutianga che chu an nih thu a sawi bawk.