Nomawi humhim beiseitu Cahill

Premier League sea­son ṭan a hnai a, club tin inbuatsaihna chuan a vawr­tawp a thleng chho tawh. Chelsea captain thar Gary Cahill chuan an nomawi humhim tur chuan player hliam neih tlem a pawimawh tur thu a sawi.

Italian manager An­tonio Conte kaihhruai Blues hian an league match hmasa ber atan Pathianni zanah Burnley FC an hmachhawn dawn a, playmaker Eden Hazard leh Tiemoue Bakayoko te hliam vangin an chawl mek a, player thar Antonio Rudiger leh Alvaro Morata te chuan duhthusamin match fitness an la nei lo bawk.

Tun dinhmunah Blues hian loan-in player 20 chuang an chhuahtir mek a, nipui transfer chhung hian Nemanja Matic, Nathan Ake, Asmir Begovic leh Juan Cuadrado te an chhuahtir tawh bawk. Stri­ker Diego Costa pawhin club thar la nei lo mah se Conte-a'n a mamawh tawh loh thu a hrilh tawh avangin a hma hun a la chiang lo.

Chelsea captain chuan, "League inelna kan ṭan leh tawh dawn a, a ngaihnawmin a phurawm hle mai. Player thar kan neih te hian kan team boruak a ti nuamin phurna nasa tak min siamsak, theihna sang tak nei an nih avangin player pawimawh tak pawh an nih ngei ka beisei," a ti.

England international defender chuan sawi chhunzawmin, "League khel turin inbuatsaihna kan nei ṭha tawk a, Community Shield-ah Arsenal hneh lo mah ila hnual phah nan kan hmang tur a ni lo. Transfer bazar-ah club ṭhenkhat an che nain sum an seng hnem a, anni nena khaikhin chuan player kan nei tam lo, hei vang hian nomawi humhim tur chuan hliam kan awm tam loh a pawimawh dawn a ni," tiin a sawi.