Premier League ṭan nan ni hnih chiah Guardiola a cham zel dawn em?
Premier League khuh hawnna Community Shield chu khelh a ni tawh a, FA Cup champion Arsenal-in league champion lai Chelsea an hneh. Italian manager Antonio Conte-a'n nomawi chawi kawngah elpui tur a nei dawn tih a hriat nghal a, pawisa thapna lam buaipuitute chuan Gunners ai mahin Manchester khaw club pahnih City leh United an la dah sang zawk a, Tottenham Hotpurs leh Liverpool te chu a tikimtu ringawt an nih hmel loh bawk.
Spanish manager Pep Guardiola-a'n huhang a ngah a, season khatnaah nomawi chawi nghal tura beisei a ni. Amaherawhchu, Barcelona leh Bayern Munich-a hlawhtling Pep-a'n kum khatnaah City chu pathumna a nih pui hram. Tun season-ah City bawk hi champion rinkai an ni a, Spanish manager chuan nomawi an chawi a nih chuan Etihad Stadium-a cham chhunzawm a duhthu a sawi tawh.
Sum ngah City
Manchester City-in Pep Guardiola an inringtawk a, 2016 kumtira Manuel Pellegrini hnuaia nomawi an la beisei vek laiin Spanish manager an lakluh tur thu hi an puang.
Arab sum mawng chawmin Pep-a'n player a la khawm a, transfer window pathum chhunga a sum hman zat hi pound maktaduai 350 a chuang tawh a, heng zinga pound maktaduai 200 bawr vel hi tun transfer-a an hman a ni. Arsenal forward Alexis Sanchez emaw player hraw dang an lalut a nih chuan kum 2009-a Real Madrid pawisa hman zat pound maktaduai 218 chu an khum ang.
Nomawi duh City
Club chairman Khaldoon al-Mubarak chuan, "Pathumna kan nih min lawmpui thu ka dawn tluka ka lung nih loh hi a awm chuang lo. Ka chhanna ṭhin chu, 'Pathumna kan nih avangin lawmna tur a awm lo a, league-a kan champion hunah chiah min lawmpui ru," tiin ka chhang ṭhin. Thil thui tak kan thlir a, Pep hian team a din mek a ni," tiin nomawiah chiah a lungawi thu a sawi.
City hian pre season-ah Manchester United (0-2) an hneh loh hnuin an khingpui pathum Real Madrid (4-1), Tottenham Hotspur (3-0) leh West Ham (3-0) te an hneh vek. Pep Guardiola-a'n player langsar panga a lakluh aṭanga player pali keeper Ederson, Kyle Walker, Benjamin Mendy leh Danilo te chu tlarhnung thuam chak nana lakluh a ni a, match hnuhnung pahniha goal an chhuah loh hi lawmna tham a tling.
Pep-a hmalam
Pep hian kum thum chhung atan City-ah hian contract a ziak a, Real Madrid 4-1 a an hneh
ṭum hian Spanish manager hian league nomawi an chawi phawt chuan contract pawhsei a duhthu a sawi a, player naupang rual a lakkhawm avangin enkawl zui zel pawh an châkawm ang.
Amaherawhchu, City hian nomawi an chawi lo a nih pawhin nakkum May thla thlenga champion thei dinhmuna an ding lo a nih chuan Spanish manager Pep Guardiola hian a contract a hmang zo thei ve bawk.
Ni hnih chiah
Premier League ṭan nan ni hnih chiah nghah a ngai tawh a, Emirates Stadium-ah Zirtawpni zan hian match hmasa ber khelh a ni dawn.
Arsenal hian 2016 champion Leicester City an mikhual dawn a, match hmasa ber aṭangin a hmuhnawm nghal ang. Gunners-in an player neih ṭhat Alexis Sanchez, Mesut Ozil, Aaron Ramsey, Laurent Koscielny leh Shkodran Mustafi tel lo chungin Chelsea an hneh tawh a, Foxes hneh turin an inringtawk khawp ang.
Leicester pawh an nomawi chawi aṭangin season khat a liam tawh a, pressure an neih tawh dawn loh avangin Gunners tan en liam theih an ni dawn lo.
Kartawp Fixtures
August 11, Zirtawpni Zan
Arsenal 12:15 AM Leicester City
August 12, Inrinni
Watford 5:00 PM Liverpool
Chelsea 7:30 PM Burnley
Crystal Palace 7:30 PM Huddersfield Town
Everton 7:30 PM Stoke City
Southampton 7:30 PM Swansea City
West Bromwich 7:30 PM AFC Bournemouth
Brighton & Hove 10:00 PM Manchester City
August 13, Pathianni
Newcastle United 6:00 PM Tottenham Hotspur
Manchester United 8:30 PM West Ham United