Milan-in manager ṭha an mamawh - Ancelotti

Carlo Ancelotti chuan tun hma lama a club enkawl tawh AC Milan chungchang a sawi a, ropui taka tho chhuak leh tur chuan manager ṭha an mamamwh nia a hriat thu a sawi.

Milan hi Serie A mai ni loin, European football-ah pawh a lian zinga mi an ni ṭhin. Mahse, tun hnai kum 10 chhung deuhthaw chu beisei an phak ta lo, Chinese sumdawng hausa kuta an luh hnuah player lei khawm ṭhin mah se an ropui theih rih lo.

Stefano Pioli kaihhruaina hnuaiah an khel mek a, Serie A club ṭha zinga chhiar tel an ni lo. Tawnhriat nei ṭha Ralf Rangnick nen sawi zawm ni mah se German coach hian Milan nen indawrna an tihtawp thu a sawi tawh.

Milan tana Serie A leh Champions League chawi tawh Ancelotti chuan, "Fans lamin hnehna chan an duh a, sang taka awm leh an chak. Italian mi kher manager neih duh an awm laiin, hnam dang neih pawiti lo an awm bawk.

"Ka hmuh dan chuan Milan hian hmasawn leh tur chuan manager ṭha a mamawh. Italian mi kher a ngai lo, hmasawn tur chuan ruahmanna danglam leh tun hma lama kan la hriat ngai loh tih a ngaih chang a awm," tiin a sawi.

Italian manager hian Milan-in striker Zlatan Ibrahimovic an lalut leh hnuhnawh chu a lawm thu a sawi lang tel bawk.