Venus vul niah French Open champion tla

Thawhṭannni zan Ca­nadian Open inkhelah Venus Williams-i'n hneh­na a chan laiin French Open champion Jelena Ostapenko leh seeded 13-na Kristina Mladenovic te rawh an zinkawng a tawp nghal.

Rogers Cup first round-ah Venus hian awlsam takin hnehna a chang mai bik lo, Ro­­manian nula Irina-Camelia Begu chu 6-1, 3-6, 6-3 in a hneh hram a ni.

Kum 37 mi Venus hi Wimbledon final-ah a chak lo a, a kum tam deuh tawh mah se pla­yer naupang zawk tan khingpui hautak tak a la tling. Kumina Grand Slam hnuhnung ber tur US Open atan inbuat­saihna a nei chho mek.

Inkhel dangah Barbora Strycova chuan harsatna nei loin rinkai zinga mi Mladenovic chu 6-2, 6-3 in an hneh. American Varvara Lepchenko chuan rin loh tak maiin Roland Garros nomawi kawltu Ostapenko chu darkar khat leh minute 36 chhungin 1-6, 7-6(2), 7-6(5) in a hneh ve bawk.

Mipui ṭan hlawh Petra Kvitova erawhin hliam na tak a tawrh hnuah match pangngai a khel chho ve thei ta zel, Czech Republic nula hian aces vawi ruk a siam bakah winners vawi 32 vuain Spaniard Carla Suarez Navarro chu 6-1, 7-6(5) in a hneh. Japan nula Naomi Osaka leh Russian Daria Kasatkina te pawhin first round an paltlang ve bawk.