China lamin Maria Sharapova duhsak

Maria Sharapova chuan China Open khel turin wildcard a dawng a, duhsak taka sawmna a dawn hi tipuitling tura Beijing pan ngei a tum.

Grand Slam vawi nga champion tawh Sharpova hi a malpui na vangin Wimbledon bakah grass court season zawng zawngah a inlan lo a, kar hmasa khan hard court tournament pakhat Stanford-ah inlan ve mah se second round-ah a ban na vang bawk­in a inhnukdawk leh.

Russian nula hi thla 15 chhung hrem a nih hnuah April khan a rawn kir leh tawh a, mahse beisei angin a khel chhuak thei rih lo - tournament pali chiah a la khel a, nomawi a la chawi rih lo.

Kum 30 mi Sharapova chuan, "China Open buat­saihtu hnen aṭanga wildcard ka hmu hi ka lawm a, October thlaah chuan Beijing-ah ka inkhelh ngei ka beisei," tiin a sawi.

Asia-a khelh ṭhin tourna­ment zinga ngaihhlut China Open-ah hian Garbine Mugu­ruza, Caroline Wozniacki, Venus Williams leh khawtual nula pahnih Zhang Shuai leh Peng Shuai te chu inlan tura beisei an ni, inelna hi September 24 aṭanga October 8 thleng neih tur a ni.