Nomawi duh Rafael Nadal

Rafael Nadal chuan hard court season hman ṭhat theih a inbeisei a, tun kar chhunga khelh tur ATP Montreal Masters-ah nomawi chawi theih ngei a beisei thu a sawi.

Tun dinhmunah Nadal hi world number 2 a ni mek a, Montreal Masters-ah hian semifinal a thleng thei a nih chuan Andy Murray luahlanin karleha ranking chhuak thar ber turah chuan a chung berah a awm thei dawn a ni.

Kum 31 mi Nadal chuan, "Ranking hi ka ngaih pawimawh ber a ni hran lo a, ka ngaih pawimawh zawk chu inbuatsaihna ṭha leh court chhunga ṭha taka khelh theih a ni. Kuminah ka khel ṭha chho hle a, hard court-ah pawh result ṭha neih zel ka inbeisei hle. Nomawi chawi ka duh a, chumi ti hlawhtling tur chuan theihtawp ka chhuah ang," tiin a sawi.

Tun tournament-ah Nadal hi seeded pakhatna a nih avangin first round a bye a, zanin hian a match hmasa ber a khel ve chauh ang. Nizana Mikhail Youzhny leh Borna Coric te inkhela a chak zawk zawk a hmachhawn dawn a ni.

US Open inbuatsaihna pakhatah hian Nadal bakah Roger Federer leh Juan Martin del Potro te pawh an inlan dawn a, Novak Djokovic leh Stan Wawrinka te erawh hliam vangin an inlan thei dawn lo thung.

Thawhṭanni zan khan first round khelh niin Nick Kyrgios, Mischa Zverev, Gael Monfils, David Ferrer leh Del Potro te chuan first round an paltlang vek.