Seeded 10 zingah Sindhu leh Srikanth

Badminton World Championship chu August 21 aṭangin Scot­land khawpui Glasgow-ah khelh tur a ni a, In­dian shuttler zingah PV Sindhu leh Kidambi Srikanth te chu hmeichhia leh mipa inelnaah seeded 10 zingah an lang phak.

Rio Olympic silver medalist Sindhu hi seeded palina a ni dawn a, Indian player zingah seed chang sang ber a ni ang. Kum 22 mi Sindhu hian Olympic-a medal a lak hma khan 2013 leh 2014 World Championship-ah te khan bronze medal a lo dawng tawh a, kuminah beiseina a nei sang hle.

Hmeichhe inelnaah hian Japan nula Akane Yamaguchi chu seeded pakhatna a ni dawn a, world number 1 hlui Saina Nehwal chu seeded 12-na a ni thung ang. Saina hian tun hmain final a thleng tawh a, gold medal inchuhna inkhelah Carolina Marin a ngam lo.

Mipa singles lamah tun hnaia che ṭha chho tak Kidambi Srikanth chu seeded pariatna a ni phak a, Olympic champion vawi hnih ni tawh Lin Dan chu parukna a ni thung.

Kum 24 mi Srikanth hian nikum Rio Olympic khan quarterfinal a thleng a, tun hnaiah Indonesia Open leh Australian Open Superseries title a la leh tawh. India tlangval zingah Singapore Open champion Sai Praneeth chu seeded 15-na niin Ajay Jayaram leh Sameer Verma te erawh seeded zingah an tel phak lo.