Barcelona khelmualah Chapecoense an inlan

November 2016-a an chuanna thlawhtheihna chetsual vanga an players 19 ngawt chantu Chapecoense chuan Thawhṭanni zan khan Nou Camp-ah Barcelona chu friendly match an khelhpui a, 5-0 in an tlawm.

Chapecoense tan thlawh­theihna chesuala players dam chhuak pathum zinga mi Alan Ruschel chuan captain armband a hreng a, chetsualna an tawh hnua khelmual a rah leh hmasak ber a ni. Ruschel rual hian dam chhuak zinga mi goalkeeper Jackson Follman leh defender Neto-te chu inkhel ve lo mah se mipui hmuh turin phochhuah an ni a, Nou Camp-ah Neto-a'n a mittui a dang zo lo.

MS = goal

Season hmasa lawkah kha chuan Barcelona tlarhma sawi nan MSN tih ṭhin a ni a, mah se Neymar a chhuah tak avangin 'MS' an ni rih - Catalan club hi Philippe Coutinho, Ousmane Dembele leh Eden Hazard-te nen la sawizawm reng niin MS hi C, D leh E zingah a 'eng' berin nge a tawp dawn a la chiang rih lo. Thil chiang tak erawh Neymar tel lo pawhin Lionel Messi leh Luis Suarez an buai lo.

Barcelona tan Gerard Deu­lo­feu, Sergio Busquets leh Lionel Messi-ten first half-ah goal an khung a, Luis Suarez leh Denis Suarez ten second half-ah goal khung bawkin Brazilian club-in a chhanletna tur an neih ve loh avangin an tlawm.

Neymar thlaktu Deulofeu?

Barcelona-in Neymar an hralhna aṭangin pound mak­taduai 200 an nei a, Brazil captain thlakna tur lei tur hian pawisa an nei tih a chiang. Catalan club hian Brazilian forward thlaktu tur pawh an zawng ngei a, player langsar tak tak hming lam rik a ni - mahse Thawhṭanni zana Deulofeu khelh dan enin Barca hian Neymar thlaktu tur an kawl tawh reng a ni lo maw? tih chu zawhna a ni.

Kum 23 mi forward hi Barca youth system chhuak a ni a, Everton (2013-14) leh Sevilla (2014-15)-ah loan-a chhuahtir a ni. Kum 2015-ah a nghetin Everton a zawm a, English club hian January 2017 khan AC Milan-ah loan-in an kaltir. Serie-A ah Spanish forward hian a hming a chher a, an hralh tirah 'lei let theihna' dan siam teltu Barca-in an la let - Chape lakah Spain tana vawi thum inlan tawh forward hian goal khat a khung bakah assist vawi hnih a nei a, a khel a hmuhnawm takzet bawk.

Eng inkhel nge?

Barcelona hian season ṭan hmain Nou Camp-ah team phochhuahna hun an hmang ṭhin a, inelna hi club dintu zinga mi Joan Gamper hming chawiin Joan Gamper Trophy tih a ni. Kum 1966 khan khelh ṭan a ni a, a tir lamah chuan team paliin an khel ṭhin.

Kum 1997 hnuah erawh Bar­­celona-in club pakhat an khelh­pui ṭhin a, tun hnaia an khelhpui zingah Bayern Munich, Inter Milan, Santos, AS Roma leh Sampdoria-te chu club langsar an ni. Nikuma chhiatna rapthlak tak an tawh avangin Chape hi sawm an ni a, thlawhtheihna chesuala nunna chan mi 71-te hriatrengna hun hman a ni.

Chape thawhlehna

Chapecoense-in chhiatna rapthlak tak an tawh hnuah hnual taka awm mai an tum lo a, an squad an din ṭha lehnghal. Copa Sudamericana final an luh ṭuma, "Tunah hian thi pawh ni ila, hlim takin khawvel hi ka mangṭha thei ang," titu Caio Junior thlak turin coach Vinícius Eutropio an lalut.

Brazilian coach tawnhriat nei ngah kaihhruaina hnuaiah player thar 25 ngawt an lalut a, player tam zawk hi loan-a lak niin player pakua chu youth team aṭangin senior team-ah hlan kai an ni. Thawhṭanni zan inkhelah pawh hian Chape player-te hian chhiatna avanga nunna chan mi 71 te hming chuanna jersey an ha a ni.an zin ṭuma thlawhtheihna chesuala dam chhuak player pathum (L-R) Jakson Follmann, Neto leh Alan Ruschel-te Nou Camp-ah an inlar.