Kolasib-ah TT training nei mek
Mizoram Table Tennis Association leh Kolasib District Table Tennis Association ṭangkawpin an buatsaih ni 100 awh tur Table Tennis Intensive Coaching Programme chu New Diakkawn Community Hall, Kolasib-ah neih mek a ni.
Training hi kar hmasa Inrinni khan hawnna hun hman a ni a, Kolasib-ah hian Table Tennis zirturin naupang 52 in hming pe lut tawhin hming la ziah luh belh zel a ni. Sports Council a Table Tennis senior coach, NIS Patiala chhuak R. Lallunghnema leh Lalngainatawma ten naupangte hi training an pe.
MTTA hian Mizoram State Sports Council leh Sports & Youth Services puih nain Table Tennis ni 100 coaching hi Lunglei leh Serchhipah te a kalpui ṭan tawh a, heng bakah hian Aizawlah training hi neih leh tura ruahman a ni bawk.