Kipyegon umphak an awm lo

World Athletics Cham­pionship neih mekah Thawhṭanni zan khan hmeichhe 1500m intlansiak neih a ni a, Rio Olympic champion ni lai Faith Kipyegon chuan minute li leh second 2.59 chhunga thlengin pakhatna a ni.

London Stadium-a intlansiakah hian an inel tawk hlawm hle a, Kenya nula Kipyegon hnungah hian American star Jennifer Simpson a thleng thung a, an inthlauhna chu second 0.17 chiah a ni, pathumna chu Caster Semenya (4:02.90) a ni thung.

Kum 23 mi Kipyegon chuan, "Kan inum tawk hle dawn tih ka hria a, inelna hautak hmachhawn tur pawhin ka inbuatsaih nasa hle. He hmunah hian hnehna chan duhin ka kal a, a pawimawh ber pakhatna ka nih theih avangin ka lawm hle," tiin a sawi.

Feet 5 leh inches 2-a sang Kipyegon hian junior leh youth lamah chuan khawvel huapah gold medal a la tawh a, senior level-ah erawh nikum khan a vawi khat nan Olympic-ah gold medal laiin tunah a chhunzawm leh ta a ni.

Hmeichhe 800m in­tlansiakah hian champion lai Genzebe Dibaba-i chuan beisei a phak lo a, 12-naah thlengin a hnung ber a ni a, pakhatna Kipyegon hi second li ngawtin a phak lo.