Vawiinah I Day Football Semifinal - Mama a khel dawn em? Aizawl FC vs Chanmari FC
I League champion Aizawl FC-in Portuguese coach Paulo Menezes kaihhruainain Great Sports I Day Football semifinal an lut a, vawiin chawhnu dar 2:30 hian Chanmari FC nen Lammualah final khel tur an zawng ang.
MFA Super Cup first round-ah AFC hian Chanmari FC hi penalty shootout hmangin an hneh tawh a, hemi hnu hian I League club hian coach thar bakah player an neih belh avangin final lut tura rinkai zawk an ni.
Aizawl FC hian player thar S Malsawmtluanga an nei a, an luhtir nghal ang em? Portuguese coach thar Paulo Menezes thu thu a ni ang.
Intawnna hmasa
RG Stadium-ah July 6 khan I League champion leh MPL champion laite hi an inkhel a, inkhel hmuhnawm tak a ni lo. Minute 90 chhunga khel ṭha zawk Chanmari FC chu penalty shootout-ah an vanduai.
Intawn hmasak ber hi vawiina an inkhel tur thlir lawkna atan hman theih a ni tawh lo. Tunah chuan team pahnih hi a hma aiin an ṭha tawh ve ve. Final khel tur zawnna a nih bawk avangin football hmuhnawmna an lantir theih beisei a ni.
Danglamna Paulo
Portuguese coach Paulo Menezes awm hmain Aizawl FC-in I Day Football-ah match thum an khel hman a; chak, draw leh chak loh ṭum a neih hman vek avangin tla thei an ni. Spanish coach hnuaia an match hmasa berah Ramhlun North hneh a ngai a, pressure sang tak hnuaiah AFC-in 2-1 in an hneh.
Aizawl FC coach thar Menezes chuan, "Club dang sawmna pawh ka dawng a, amaherawhchu AFC hi an thil tum ka duh avangin ka rawn zawm a ni. I Day Football, MPL leh I League-a champion vek an duh a, AFC Champions League-ah theihtawp kan chhuah bawk ang," a ti.
AFC hian MFA Super Cup-a Chanmari an hneh hnuah Mizo winger ṭha S. Malsawmtluanga, Nigerian defender Kareem Omolaja, MPL4 best midfielder K. Lalṭhathanga leh an defender hlui Lalrozama Fanai te an la leh tawh a, en châkawm tham an ni.
Menezes chuan, "Player 11 ve vein kan khel dawn a, rinkai zawk an awm lo. Chutihrualin player thlir mai chuan a ṭha zawk pawh kan ni thei a, a pawimawh ber erawh khelmual chhunga a ṭha zawk nih a ni," tiin Vanglaini a hrilh.
Chanmari lam
Chanmari FC-in semifinal an lut a, amaherawhchu Chhinga Veng lakah goal nga an chhuah a, phuba lak an duh a nih chuan final an thlen a ṭul ang.
Chanmari coach H. Vanlalthlanga chuan, "Aizawl FC-in an player duh ang an inla fel thawkhat tawh a, keini aiin an ṭha zawk tiha sawi duh an awm pawhin dawt an sawi lo ang. Chutihrualin keini lam pawh hmasawn tumin theihtawp kan chhuah a, kan intawn hmasak ai kha chuan hma kan sawn tawh," tiin Vanglaini a hrilh.
MPL champion lai hian Shillong Lajong aṭangin Joseph Lalfakzuala an lalut a, training-naa a inhliam avangin vawiinah a inlan a beiseiawm loh. Chanmari hian winger chak ṭha an nei a, Aizawl FC an fimkhur hle a ngai ang.
Inkhel en man Rs 30/- a ni a, school naupang uniform ha tan en man chawi a ngai lo ang.
VAWI 23 INTAWN TAWHNA CHU
Club Pld W D L
Aizawl FC 23 13 1 9
Chanmari FC 23 9 1 13
MIZORAM PREMIER LEAGUE
MPL1 QUALIFIER
Aizawl FC 2 - 1 Chanmari FC
MPL1
Aizawl FC 0 - 2 Chanmari FC
Chanmari FC 0 - 1 Aizawl FC
MPL2
Aizawl FC 0 - 2 Chanmari FC
Chanmari FC 2 - 1 Aizawl FC
MPL3
Chanmari FC 0 - 1 Aizawl FC
Aizawl FC 1 - 1 Chanmari FC
MPL3 FINAL
Aizawl FC 1 - 0 Chanmari FC
Chanmari FC 3 - 2 Aizawl FC
Penalty Shootout-ah Aizawl FC 4-2 in an chak
MPL4
Aizawl FC 3 - 2 Chanmari FC
Chanmari FC 0 - 1 Aizawl FC
MPL4 FINAL
Aizawl FC 3 - 0 Chanmari FC
MPL5
Chanmari FC 1 - 0 Aizawl FC
Aizawl FC 2 - 1 Chanmari FC
MPL5 Semifinal
Chanmari FC 4 - 1 Aizawl FC
Aizawl FC 1 - 2 Chanmari FC
Agg-ah Chanmari FC 6-2 in an chak
I DAY FOOTBALL
2012 - SEMIFINAL
Aizawl FC 2 - 1 Chanmari FC
2014 - SEMIFINAL
Chanmari FC 1 - 2 Aizawl FC
2016 - GROUP STAGE
Aizawl FC 1 - 2 Chanmari FC
MFA SUPER CUP
2016 - FINAL
Chanmari FC 0 - 1 Aizawl FC
2017 - FIRST ROUND
Aizawl FC 0 - 0 Chanmari FC
Penalty Shootout-ah Aizawl FC 3-2 in an chak
I LEAGUE 2ND DIVISION - 2015
Aizawl FC 2 - 3 Chanmari FC
Aizawl FC 4 - 2 Chanmari FC