August 31-ah MPL Season 6

10th August, 2017

Mizoram Premier League Season 6 chu August 31, 2017 hian khelh ṭan a ni dawn.

MPL Board leh MPL Club aiawhte chu nimin khan Tourist Lodge, Chaltlangah an ṭhu khawm a, MPL6 chungchanga thil pawimawhte an rel.

MPL6 chu season hmasa angin club pariatte vawi hnih theuh an inkhel chhuak ang a, a tawpa a sang paliin semi final an khel ang. Semi final hi double legged-a khelh tur a ni ang a, final in a zui ang.

MPL6-a Round 8 bik hi Aizawl pawna khelh tura ruahman a ni a, MPL5 khan Champhaiah MPL inkhel hi nghah a lo ni tawh a ni.

August 25 hian MPL Kickoff neih tur a ni a, he hunah hian football club leh footballer-te tana thil pawimawh inhrilhna hun pawh hman nghal a ni ang.

MPL Under 18

October atang hian MPL Under 18 khelh a ni dawn a, January 1, 1999 hnu lama piang tan khelh theih a ni ang. September 1-15 chhung MPL Under 18 registration hi a kalpui theih ang.

MPL Under 18 hi team tinte hi vawi khat theuh an inkhelh kual hnuah a sang paliin semi final an khel ang a, a tawpah final in a zui ang.