Sanchez contract pawhsei kan tum - Wenger

Arsene Wenger chuan season thar tawp ruala a contract tawp tawh tur Alexis Sanchez chu an hnena a cham zui zel theih nan a contract pawhsei an tum thu a sawi.

Chile international Sanchez hian Confederation Cup a khelh avangin player dang aiin team training a zawm tlai a, training zawm tawh mah se match fitness a la neih ṭhat loh avangin Zirtawpni zana Leicester City nen Premier League match hmasa ber an khelh hunah a la inlan thei dawn lo.

Gunners manager Wenger chuan Sanchez chungchang sawiin, "Community Shield kan khelh hma khan training-na lamah hliam a tuar a, hei vang hian Foxes a hmachhawn thei dawn lo a, kan match hnihnaa Stoke City nen kan inkhelh hunah pawh a inlan theih ka la ring lo. Player dangte erawh league bul ṭan turin an inpeih tawh," tiin a sawi.

Barcelona forward hlui hian contract thar a ziah mai loh avangin club lian ṭhenkhat nen sawi zawm a ni a, league lama an elpui Manchester City leh player ṭha lakluh nana sum ren miah lo Paris Saint-Germain pawh an tel.

French manager Wenger hian City lakah an player ṭha an chhuahtir loh tur thu a sawi tawh a, nimin tlai khan thuthar thehdarhtute hmaah PSG nen hun rei tak chhung inbiakna an neih tawh loh thu a sawi bawk.

Contract thar chungchang sawiin Wenger chuan, "Sanchez contract pawhsei hi thil theih reng a ni a, kan tum dawn a ni. Tih theih loh chhan tur engmah a awm lo a, a hmawr kan la bawk lo deuh mai a ni," tiin season hmasa Gunners tana goal khung hnem ber chu Emirates Stadium-a chelh zel a tum ruh hle.