Real-in UEFA Super Cup chawi nawn

UEFA Champions League champion Real Madrid-in Macedonia khawpui Skopje-ah Europa League champion Manchester United 2-1 in an hneh a, Zinedine Zidane-a hoten kum zawnin UEFA Super Cup an la.

Thawhlehni zan inkhelah Real-in Casemiro leh Isco te hmangin goal an khung a, United striker thar Romelu Lukaku goal-in result a thlak danglam pha lo.

Khawlum hnuaiah

Europe chhim lam chu thli lum 'Lucifer' nen intawng fuhin inkhelhna hmun Skopje khaw lum zawng hian 40C a hawlh pha fo a, Thawhṭannia United-in training an neih laia khaw lum zawng chu 36C a ni.

Khaw lum vang hian halftime bakah tui in chawlh ṭum hnih siam a ni.

Manto rual

Manchester United-in tun season-ah player pathum Everton striker Lukaku (£75m), Chelsea midfielder Nemanja Matic (£40m) leh Benfica defender Victor Lindelof te an lalut a, Mourinho chuan an pathuma pound maktaduai 146 man player-te hi inkhel bul a ṭantir nghal vek.

Real Madrid lamin Confe­derations Cup khelh vanga chawl rei Cristiano Ronaldo chu bench-ah an dah a, ani chauh hi Champions League final-a Juventus hnehtute aṭanga awl awmchhun a ni.

Real an thiam

Real Madrid-in inkhel an thunun a, mual chanveah an inkhel. Minute 24-naah Dani Carvajal ball vawrh chu kum 25 mi Casemiro-a'n United defender thar Lindelof venna hnuai aṭanga talputin goal hmahruai a khung a, Brazilian midfielder hian hemi hma hian crossbar a tauh per bawk.

Los Blancos hian first half-ah 71% ball an chang a, Mourinho hoten goal ven hna an thawk. Second half-ah pawh inkhel a danglam lo a, Isco chuan Bale a wall pass hnuah goal hnihna a khung a, minute 52 chiah a la ral.

United nena sawi zawm Bale-a'n crossbar a pet per a, David de Gea khelh ṭhat zarah Toni Kroos, Karim Benzema leh Marco Asensio te hming scoresheet-ah a lang lo.

Mourinho hoten Lukaku hmangin minute 62-naah goal khat an chhang let a, he goal hi Matic-a ball pet keeper Keylor Navas dan per fuh tawk lo aṭanga lut a ni. Belgian striker hian United tana competitive match a khelh hmasak berah goal khung nghal mah se chance ṭha dang hnai tak aṭangin a hlah.

United rawlthar duhawm Marcus Rashford-a'n siphurh sutna hun ṭha a nei a, keeper Navas chiah hmachhawn mah se goal-ah a chantir thei lo. Hemi hnu hian Cristiano Ronaldo rawn inlanin Portugal captain hian a club hlui lamah goal a khung lo a, 2-1 in inkhel a tawp.

Zidane leh nomawi

Kum 45 mi Zinedine Zi­dane-a'n a inkhelh hun laiin Champions League nomawi vawi khat chiah a chawi a, Real Madrid tana a lak a ni. French pachal hian Los Blancos senior team season khat leh a chanve lek a enkawl chhungin Champions League nomawi vawi hnih a chawi der tawh.

Zidane hian UEFA Super Cup vawi hnih a chawi zui a, La Liga leh FIFA Club World Cup-ah a champion tawh bawk. French manager Zidane chuan, "Theihna sang tak kan nei tih kan hria a, hlawhtlinna duhin kan tuihal bawk. Kan neih tawhsa a lungawi mai loin neih belh zel duhna kan nei a, kan khelh dan khan duhthusam a hnaih hle. Goal khat chu khung belh leh ila, ka lungawi ang," tiin a sawi.

Real boss chuan sawi chhun­zawmin, "Inkhel kan thunun a, inkhelh ve kan phalsak lo. Ball kan chanin kan talbuai lo a, team pumpui inpekna a fakawm bawk," tiin an khelh dan chhuang takin a sawi.

Mourinho thukhawchang

Manchester United manager Jose Mourinho chuan, "Kan tiṭha thawkhatin ka hria. 2-1 in kan chak lo a, kan inthlauhna hi goal khat chauh a ni. An goal hmasa zawk kha VAR chu hman ni se chuan 1-1 a ni ang a, extra time kan thleng ang," tiin Real goal hmahruai chu offside a nih thu a sawi.

Portuguese manager chuan sawi chhunzawmin, "Goal tam zawk khung thei an ni a, keini pawh goal tam zawk khung thei kan ni. First half-ah inkhel thunun lai an nei a, keini lamin second half-ah thunun lai kan nei ve bawk. Team ṭha tak kan hmachhawn a, hun tawp hma hret chauhin result a chiang," tiin an inthlauh loh thu a sawi.

Jose Mourinho hi manager zinga European Super Cup vawi thum chak lo hmasa ber a ni a, hemi hma hian Chelsea (2013) leh FC Porto (2003) te a chak lo pui tawh bawk.