An ramah Bouchard a tlawm

Canadian tennis star Eugenie Bouchard-i'n tun hnaiah result ṭha a nei hleithei lo. Thawhlehni zan khan Rogers Cup first round khelh niin Bouchard hi Donna Vekic lakah darkar khat leh minute 34 chhungin 6-3, 6-4 in a chak lo nghal.

World number 5 hlui Bouchard hi French Open second round-ah a tla a, clay court inelna lian hnuah hian match khat chiah hnehna a la chang leh a, hard court-ah pawh beisei ang result a la nei thei lo zel tihna a ni.

Seeded pawh chang phak lo Croatian nula Vekic lakah Bouchard hian unforced errors vawi 32 zet a nei a, double fault vawi sarih neiin a service ṭum ruk chhuhsak a ni bawk, an ramah a khel chhe hle.

Wimbledon final bakah Australian Open leh Roland Garros semi­final pawh khel tawh Bouchard hi tunah chuan world ranking-ah 70-naah a tla hniam a, an rama khelh mek tournament-ah pawh hian inlan turin wildcard a mamawh hial a ni.

Inkhel dangah world number 1 hlui Caroline Wozniacki chuan harsatna nei loin Ekaterina Alexan­drova chu 6-3, 6-0 in a sawp. Wozniacki hian kum 2010 khan he hmunah hian nomawi a lo chawi tawh a, tun hnaiaah inelna hrang hrangah final vawi nga khel mah se nomawi a chawi lo.