Player lei lo Spurs Eng nge an an zel dawn?
Tottenham Hotspur-in Premier League-ah pahnihna nichungin season an khar a, beiseina sang tak nen fan-ten season thar an thlir. Mahse, nipui transfer bazar hun a lo thleng a, Spurs-in player pakhat pawh an la lalut rih lo!
Premier League-a an match hmasa ber khel turin London club hian ni hnih bak hun an nei tawh lo a, an inlak belh lo a nih ngat chuan season tharah beiseina sang tak neih a harsa dawn. Spurs-in nipui transfer-a players an hralhna
aṭanga sum an hmuh zat chu pound maktaduai 52.75 a ni a, sum an hman tawh zat chu 'NIL' a ni.
A harsa dawn
Tottenham-in transfer bazar tawp ni August 31 hmain league match thum khelh tur an nei dawn a, fixture-ah duh thlang thei ni se tuna an khelh dan tur hi an thlang kher lo ang - August 13 zana an match hmasa berah indinthar mek Newcastle United an hmachhawn dawn a, Chelsea leh Burnley an mikhual chhunzawm bawk ang. Burnley hi lo dah ṭha ta pawh ni ila, an match hmasa pahnih hi 'dil loh zawk malsawmnaa' chantir tur chuan Spurs an khelh ṭhat a ngai dawn tih a chiang.
Spurs hi an inlei belh lo mai a ni lo a, Manchester City-ah pound maktaduai 50-a Kyle Walker an kaltir hnuah a thlakna tur lei belh loin an neih sa Kieran Trippier rin an tum a, English defender hi Juventus nena friendly match an khelh ṭuma a inhliam avangin Magpies a hmachhawn thei lo ang - champion tum club tan match khat lek chak loh pawhin a hril thui dawn tih chu season tawp lama Chelsea umpha lotu Mauricio Pochettino leh a naute hi a hrechiang bertu an ni.
Wembley-ah Spurs
Tottenham-in an khelmual White Hart Lane ṭhiatin an sa ṭha mek a, an home match an khelhna tur chu England stadium lar Wembley Stadium a ni. Spurs hian season hmasaah khan Wembley hi European match bik khelh nan an lo hmang tawh a, an hman thiam loh zia tichiangtu chu beiseina sang tak nena bul ṭan siin group stage aṭanga petchhuah an ni kha a ni.
Spurs hian Wembley-ah hian season hmasa khan European match thum an khel a, match hnih tlawmin match khat chiah an chak - an home record chhiat vangin last 16 an inpetkai zo loah ngaih theih a ni a, kumin Premier League-ah pawh White Hart Lane an ngai viau ang em? tih chu zawhna awm thei a ni a, European match thum lek hi Premier League home match 19 nena khaikhina thutlukna siam nan erawh a fuh bik kher lo ang.
Spurs formation
Tottenham-in attacking football hmuhnawm an khel ṭhin a, Pochettino-a formation hman nuam tih ber chu 3-4-2-1 formation niin hei hi defensive midfield-a Victor Wanyama dah a duh vang niin a ngaih theih a, tun season-ah pawh he formation tho hi an hman a rinawm. Wanyama defensive midfield-a a awm chiah hian tlarhnung pathumah Eric Dier, Toby Alderweireld leh Jan Vertoghen an din theih phah.
Spurs tan tlarhmaah Harry Kane chu mal tlatin an innghahna ber a ni leh a rinawm a, English striker thlawp turin Christian Eriksen leh Dele Alli an awm ang. Midfield laiah Wanyama thawhpui turin Moussa Sissoko leh Mousa Dembele duhthlan tur an awm dawn a, wing back-a chhawr turin Ben Davies, Danny Rose leh Kieran Trippier an awm bawk. Tlarhmaah season hmasaa goal 21 ngawt khungtu Son Heung-min thaibo hi thil harsa tak a ni ang.
Player pawimawh
Spurs tan season hmasaa player pawimawh pathum Eriksen, Kane leh Alli bawk hi innghahna tur an ni leh dawn. Eriksen hi Spurs game siamtu ber tia chhal ngam a ni a, season hmasaah khan chance vawi 96 ngawt siamin goal riat a khung a, assist 12 a nei thei - hei mai hi a ni lo a, set piece-ah ani tluka ball pet tura duhthlan tur an tam bik chuang lo a, ball cross a thiam em em bawk.
Harry Kane ṭhat zia hrilh nawn kan ngai lo. English striker hian season hman zawh takah match 38-ah goal 35 a khung a, Premier League bikah goal 29 khungin season hnih chhung a zawnin top scorer a ni. PFA Young Player of the Year nilai Alli duh lo tur khawpa club ṭha khawvelah an awm a rinawm loh. English midfielder ṭhangduang tak hian league-ah goal 18 a khung a, tun season-ah pawh Premier League defender tan dan a hautak leh ang.
Transfer bazar
Spurs elpui tura ngaih Arsenal, Chelsea, Liverpool leh Manchester khaw club pahnih ten an mamawh player an lei nual tawh a, an la duhtawk lo vek bawk. Spurs-in tun thlengin player an la lei lo a, stadium sak nana sum an mamawh bawk si avangin London club hian an neihsa ringin Premier League an hmachhawn dawn em ni? tih chu zawhna awm reng a ni a, hetihrual hian Spurs nena sawizawm player an awm ve reng bawk.
Mauricio Pochettino-a'n, "Kan team tichak tur zawngin theihtawp kan chhuah ve reng a ni," tiin pre-season tour an neih laiin a lo sawi tawh a, tun thlengin lak belh erawh an la nei lo. Spurs hi Everton chhuahsan duhtu Ross Barkley leh Valencia right-back Joao Cancelo-te nen sawizawm mek an ni - an lalut a nih chuan team tana ṭangkai nghal thei tur khawpa thiam an ni.